Hemen zaude: Hasiera Albisteak

Albisteak

Zornotza Udal Euskaltegiak 2015-2016 ikasturterako izena emateko epea irailaren batean zabalduko du. Talde irakaskuntzaz gain, jardun biko aukera ere eskainiko du aurton. Honen bidez, ikasleak taldean lan egiteaz gain, bakarkako lana eta tutoretzak izango ditu osagarri. Bestalde, eta aukera zabalagoa eman guran, iraupen laburreko ikastaro bereziak ere eskainiko ditu, helburu zehatzetarakoak hain zuzen ere (etorkinak, tabernariak, merkatariak, gurasoak...).

Aste Santuan IKASGELA zabalik egongo da.

2018/03/23
Martxoaren 29an, 30ean, 31an eta apirilaren 1ean, 2an

Ordutegia: 9.00 / 14.00

Sarrera: Ate nagusitik.

Apirilaren 9tik aurrera zornotzarrek kirol instalazioak web orritik erreserbatu ahal izango dituzte

2018/03/26
• Ametx Erakunde Autonomoak abonatuei jakinarazten die apirilaren 9tik aurrera kirol instalazioak erreserbatzeko ez dutela Larrea kiroldegira joan beharko.

Amorebieta-Etxano, 2018ko martxoaren 26a.  Ametx Erakunde Autonomoak abonatuei jakinarazten die apirilaren 9tik aurrera kirol instalazioak erreserbatzeko ez dutela Larrea kiroldegira joan beharko.

Erreserba on line egin nahi duten guztiek horretarako aukera izango dute Ametxeko web orrian (www.ametx.eus - Zerbitzuak - Kirol zerbitzuak - Instalazioen erreserbak) dauden oharrei jarraituz. Erabiltzaile gisa alta eman eta une horretan erabilgarri dauden instalazioak erreserbatu ahal izango dituzte.

Apirilaren 10ean, ‘GOSARI GOZOA’ Urtzan!

2018/03/27
Musikaz, kafeaz eta giro jatorraz gozatu gura duzu? Zatoz ‘Gosari Gozoak’ egitasmoaren bigarren ekitaldira!

Apirilaren 10ean Urtza tabernan, Zakari Valdes 25 urteko musikari zornotzarrak kontzertu akustikoa eskainiko du goizeko 9:30etik aurrera, kafea eta pintxoa hartzen dugun bitartean. Gitarra eskuan, Valdesek berak sortutako hainbat kanta joko ditu, “folk-rock” estilokoak, denok ezagutzen ditugun bertsioekin batera.
Gainera, Urtza tabernako Julen Bazek gosari gozoa prestatuko du egun horretarako. Plan borobila, beraz, martitzen goiz baterako!
Urtarrilaren 30ean izan zen ‘Gosari Gozoak’ egitasmoaren lehenengo ekitaldia. Kasu horretan, kantaldia Tomasa jatetxean izan zen, eta berrogei lagunetik gora elkartu ginen Zeinke taldeko Pablo Ruizen kontzerturako.
Gorriz apuntatu agendan: apirilaren 10ean, Urtza tabernan elkar ikusiko dugu!

Zornotza udal euskaltegia - Udako trinkoak

2018/04/17
HABE C1 maila / EGA • Ekaina
  • Iraupena: ekainaren 1etik 28ra.
  • 4 ordu egunean - ordu erdiko atsedenaldia tartean - (09:00-13:30)
  • Matrikula: 80 ordu x 1,23 € = 98,40 €.
  • Matrikula epea: maiatzaren 14tik 25era.
  • Sarrera probak: maiatzaren 29an, arratsaldeko 16:00etan.

 

Informazio gehiago

Udaleku irekiak 2018

2018/04/19
2018 udaleku irekietan izen emateko epea zabaldu da. Apirilaren 23tik maiatzaren 11ra Zelaieta Zentroko gazte informazio bulegoan egin ahal izango da.

Dokumentazioa
Izena emateko arautegia
Datak
1. ekainaren 25tik 29ra
2. uztailaren 2tik 6ra
3. uztailaren 9tik 13ra
4. uztailaren 17tik 20ra
Ordutegiak
A. 09.00-13.00 B.09.00-15.00
Prezioa A.35€ B.75€ (Jantokia barne)
Izen-ematea Apirilaren 23tik maiatzaren 11ra (biak barne)
Ametx Txartelarekin Gazte Informazio Bulegoan. 10.00-13.00/17.00-20.00

Udaleku irekiak 2018

PDF document icon udalekuak-arautegia-2018-eu.pdf — PDF dokumentua, 111 KB (114422 bytes)

Eleizetan 2018

PDF document icon ELEIZETAN programa 2018.pdf — PDF dokumentua, 1.05 MB (1097942 bytes)

ELEIZETAN 2018

2018/04/23
Aurten ere Amorebieta-Etxanoko ermita eta elizetan ganbera-musikaren arloan Euskadin egiten den programarik originaletariko bat entzun ahal izango da, Eleizetan programa. Programaren XIX. edizioak bost ganbera-musikako kontzertu proposatzen ditu, maiatzaren 12an Etxanoko Andra Mari elizan hasita.

Maiatzaren 12an, 20:00etan, Etxanoko Andra Mari elizan: Volosi boskote poloniarra.
Maiatzaren 13an, eguerdiko 12:15ean, Bernagoitiko San Migel elizan: Balaguéra talde gaskoiniarra.
Maiatzaren 18an, 20:00etan, Boroako San Pedro baselizan: Ilona Schneider sopranoa eta Diego Caicedo gitarra-jolea.
Maiatzaren 19an, 20:00etan, Garitondoko San Isidro baselizan, Musikeneko Orion hirukotea.
Maiatzaren 26an, 20:00etan, Dudeako San Migel baselizan, Xabier de Felipe biolin-jolea eta Arrate Monasterio piano-jolea.

Programa guztia: HEMEN

 

Gauero udan 2018ko arautegia

PDF document icon arautegia_GaueroU_eus 2018.pdf — PDF dokumentua, 111 KB (113798 bytes)

GaueroUdan 2018

2018/04/24
2004-2007 jaiotako gazteentzako GaueroUdan 2018 programaren informazioa.

Norentzat: 2004-2007 jaiotako gazteentzako
Noiz: Ekainaren 25etik Uztailaren 6ra
Ordutegia: 9:00-13:30
Prezioa 80€
Izena emateko epea maiatzaren 2tik 16ra.
Arautegia eta informazioa

2018-2019 ikasturterako matrikulazioa epea zabalduko da Zubiaur Musika Eskolan

2018/04/25
· Maiatzaren 14tik ekainaren 8ra, Musika Eskolako bulegoan (13:00-18:30) egin ahal izango da

Baita online ere, hurrengo helbidean:

https://www.ametx.eus/eu/zerbitzuak/zubiaur/matrikulazioa

Eleizetan 2018

Eleizetan 2018

PDF document icon ELEIZETAN programa 2018.pdf — PDF dokumentua, 3.65 MB (3829540 bytes)

Tanborrada 2018

2018/05/15
Izena emateko epea maiatzaren 31ra arte hemen

IZEN EMATEA HEMEN

ARAUTEGIA

Hirurogeita hamar urtetik gorako tradizioa daukan ospakizuna da Amorebietako tanborrada, eta azken 40 urteotan etenik gabe ospatu izan da. Gure ustez, ekimen herrikoia da tanborrada eta, horregatik, merezi du zaintzea denboran iraun dezan eta, urteak aurrera joan ahala, aberastuz joan dadin.

Urte hauetan guztietan, profil eta ezaugarri bereziak eta esklusiboak definituz joan da Amorebietako tanborrada, eta horiek ematen diete ospakizunari bere duen izaera berezkoa.

Izaera berezi, koloretsu, parte-hartzaile eta umoretsu horri eustea, eta jaia ahalik eta erarik antolatuenean iraunaraztea da arautegi honen helburua. Hain zuzen ere, ahalegin sendoa egitea Napoleonen tropek duela bi mende baino gehiago gure lurretan barrena gauzatu zuten desfilea ospatu, jai bilakarazi eta satira eran burutzen duen jai bitxi hau bizirik mantentzeko, antolaketarik ezak edota utzikeriak jota hil ez dadin.

 

IZEN-EMATEA

Tanborrada osatzen duten gorputzetako edozeinetan (tanbor-joleak eta tanbor-jole beteranoak, fusilariak, zaldunak, sukaldariak eta kantinerak) izena ematea NAHITAEZKOA izango da, iragartzen diren egun eta epeetan, bai eta librea eta irekia ere Amorebieta-Etxanoko 16 urtetik gorako hiritar guztientzat.

Izena emateko deialdia publikoa izango da eta Ametx erakunde autonomoak iragarri egingo du, ohiko dituen bideak erabilita horretarako. Hemendik aurrera zorrotz errespetatuko dira aurreko urteko zerrendak, eta gertatzen diren bakanteak beteko dira urte bakoitzean. Ametx erakunde autonomoaren ardura izango dira izen-ematea eta entseguetako asistentziaren kontrola.

Tanborradaren batzordeak erabakiko du, urtero-urtero, gorputz berriak sortzea edo lehendik daudenen kopurua areagotzea.

 

ENTSEGUAK ETA MUSIKA ZUZENDARITZA

Tanborradaren batzordeak onartuko ditu gorputz ezberdinen entseguen egutegiak, eta argitaratu egingo ditu. Derrigorrezkoa izango da entseguetara etortzea, eta entsegu bitan baino gehiagotan huts egiteak desfilean parte ez hartzea ekarriko du.

Tanborradako doinuak, musika-konponketak, musika banda eta entseguen musika zuzendaritza Tanborradaren zuzendariaren ardura izango da.

Tanborradaren batzordeak  aukeratuko du, ados jarrita, tanborradaren zuzendaria.

 

TANBORRADAREN BATZORDEA

Honakoak izango dira tanborradaren batzordekideak:

Tanborradaren zuzendaria; 2 fusilari (gorputzaren nagusia barne); 2 tanbor-jole beterano, 2 tanbor-jole gazte; 2 sukaldari; 2 kantinera; 2 antortxero; zaldun 1; Ametx erakunde autonomoaren teknikari 1.

Honakoak izango dira tanborradaren batzordearen eskumenak: Kideen kopurua handiagotu edo gutxiagotzea, tanborradaren ibilbidea, geldialdiak eta amaiera definitzea, uniformea bezalako oinarrizko gaietako aldaketak erabakitzea eta, orokorrean, giro baketsua bermatzea eta konponbidea ezartzea gorabeherak gertatzen direnean, eta tanborradaren zuzendariaren izendapenean parte hartzea.

 

ZUZENDARIA

Agintari nagusia izango da tanborrada prestatzeko entseguetan eta tanborrada gauzatu bitartean. Zuzendariaren eskumena izango dira diziplina neurri guztiak, ibilaldiaren aldaketak, tanborrada osatzen duten gorputzen kokalekua, errepertorioa… Tanborrada osatzen duten gorputzen arduradunei emango die horien guztien berri eta apelaezinak zaingo dira beraren erabakiak.

Tanborrada osatzen duten gorputzen koordinazioa zuzendariaren erantzukizuna izango da. Gorputzen nagusiak batuko ditu desfileari ekin aurretik eta, bere erabakien berri emateko, egoki deritzon guztietan.

 

UNIFORMEAK ETA MATERIALA

Tanborradarako erabiltzen diren uniformeak (kasakak, txanoak, amantalak, txalekoak…) jabetza publikokoak dira, eta halakoak dira tanborradan erabiltzen diren gainerako materialak ere (tanborrak, makilak, fusilak, kanoia, lapikoak…). Ametx erakunde autonomoaren ardurapekoa da beraien zainketa eta biltegiratzea, tanbor-jole beteranoen kasakak izan ezik (tanbor-joleenak eurenak dira).

Honakoak dira tanborrada osatzen duten gorputzen uniformeak:

Tanbor-joleak eta tanbor-jole beteranoak

  • Tanbor-joleen kasaka (alkandora zuria eta lazo beltza).
  • Beteranoen kasaka (ez daramate alkandorarik, kamisetarik edo lazorik bistan).
  • Praka zuri luzeak (jeans erakoak ez)
  • Itsasontzi tankerako txanoa, apaingarria ezkerretara.
  • Zapata beltzak (zapatillak ez).

 

Fusilariak

  • Kasaka bandaz (ez alkandorarik, ez kamisetarik, ez zintarik) eta zapi zuri pertsonala.
  • Praka zuri luzeak (jeans erakoak ez).
  • Txanoa.
  • Zapata beltzak (zapatillak ez).

 

Zaldunak

  • Kasaka bandaz.
  • Txanoa.
  • Alkandora zuria lazo beltzaz.
  • Praka zuriak.
  • Zaldi gainean ibiltzeko botak.
  • Eskularru zuriak.

 

Sukaldariak

  • Sukaldarien prakak eta kasaka.
  • Zapia.
  • Txanoa.
  • Zapata beltzak.

 

Antortxeroak

  • Kasaka urdina.
  • Praka urdinak.
  • Alkandora zuria.
  • Zapatak.
  • Txanoa.

 

Kantinerak

  • Alkandora.
  • Txalekoa.
  • Gona.
  • Abarketak.

 

Tanborradaren kideek bere horretan erabili beharko dute tanborradaren uniformea, agerian eranskin edo osagarri pertsonalik gehitu gabe (fusilariak izan ezik. Beraien zapi zuria daramate hauek). Uniformetasuna nabarmen urratu, materiala behar den moduan zaindu ez edo justifikaziorik gabe hondatzeak tanborradatik aldentzea ekarriko du, zuzendariak hala erabakiz gero.

Tanbor-joleek eta fusilariek debekatuta izango dute erretzea tanborrada gauzatu bitartean (ezarrita dauden atsedenaldietan izan ezik), eta ezingo dute txilibiturik, turutarik edo bestelako soinu-tresnarik erabili, aginduak betetzeko beharrezkoak direnak besterik ez, hain zuzen ere.

TANBORRADA AMAITZEN DENEAN, MATERIALA (tanborrak, makilak, fusilak…) ETA UNIFORMEAK (kasakak, txanoak) ITZULI BEHARKO DITUZTE KIDE GUZTIEK, HORRETARAKO ADIERAZTEN ZAIEN TOKIAN. BERAIENAK DIRENAK (beteranoen kasakak) EZ DIRA ITZULI BEHAR ETA KANTINEREN JANTZIAK 5 EGUNEKO EPEAN ITZULI BEHARKO DIRA, DENAK BATERA.

 

Zein da euskararen egoera Zornotzan? Parte hartu on-line inkestan!

2018/05/07
Udalak parte-hartze prozesu bat abiatu du, euskararen egoera aztertu eta egindako lana ebaluatzeko. Inkesta maiatzaren 7tik 21era arte erantzun ahal izango da. Horrez gain, tailer irekia antolatuko da ekainaren 2an.

Zer egin daiteke Zornotzan euskararen erabilera bultzatzeko? Zer iruditzen zaizu Udalak arlo honetan egindako lana? Zer hobetuko zenuke?

Horrelako galderei erantzuteko aukera izango dute zornotzarrek, maiatzaren 7tik 21era arte, Udalak jarritako on-line inkestaren bidez (EGIZU KLIK HEMEN INKESTAN PARTE HARTZEKO).

Euskararen erabilera indartzeko asmoz, Amorebieta-Etxanoko Udalak Euskararen Plan Estrategiko berria landuko du 2019an. Plan horretan, hurrengo urteetako hizkuntza-politikaren ildoak ezarriko dira.

Plan berria abiatu baino lehen, Udalak orain arte euskararen arloan egindako lana ebaluatu, eta, gaur egun, herrian euskararen egoera zein den jakin nahi du. Horretarako, Udalak prozesua abiatuko du Elhuyar Aholkularitzagaz elkarlanean, azken urteetan egindakoa ebaluatzeko.

Azterketa hori egiteko, datu soziolinguistikoak aztertzeaz gain, herritarren parte-hartzea ere ezinbestekoa izango da. Zornotzarrek bide bi izango dituzte prozesuan parte hartzeko:

- On-line galdetegi bat. Iritziak, ideiak eta espektatibak jasoko dira. Epea: maiatzaren 7tik 21era arte.

- Herri-gogoetarako tailerra: euskararen erabileraren inguruko talde-hausnarketa egiteko saio bat egingo da, modu ludiko eta entretenituan. Tailerra ekainaren 2an, larunbata, izango da, Zelaietan, 10:00etatik 13:00etara. Saioa herritar guztiei irekia izango da. Ez da beharrezkoa aldez aurretik izena ematea.

Prozesuaren inguruko zalantzarik izanez gero, Udaleko Euskara Zerbitzuarekin jar daiteke harremanetan: jnafarrate@Amorebieta.eus eta rugalde@ametx.eus helbideak, edo 94 630 00 02 (luz. 113) telefono zenbakian.

Amorebieta-Etxanoko eta Lemoako Udalek berritu egin dute kirol instalazioen erabilerarako hitzarmena

2018/05/15
• Lemoan erroldatuta dauden biztanleei Larreako kiroldegian abonua eginez gero, Amorebieta-Etxanon erroldatuta dauden erabiltzaileei aplikatzen zaien kuota berbera aplikatuko zaie. • Honez gain, Amorebieta-Etxanon erroldatuta dauden hiritarrei, Lemoako igerileku irekietan abonua eginez gero, Lemoan erroldatuta dauden erabiltzaileei aplikatzen zaien kuota berbera aplikatuko zaie.

Amorebieta-Etxano, 2018ko maiatzak 14.  Kirol zerbitzuen eskaintza areagotzeko eta udalerrien zerbitzuei etekin oparoagoa ateratzeko xedez, 2017an sinatutako hitzarmena berritu egin dute Amorebieta-Etxanoko eta Lemoako udalek. Akordio horri esker, Lemoan erroldatuta dauden biztanleei, Amorebieta-Etxanoko Larrea kiroldegian urteko, sei, lau edo hiru hilabeteko abonua eginez gero, Amorebieta-Etxanon erroldatuta dauden erabiltzaileei aplikatzen zaien kuota berbera aplikatuko zaie Larrea kiroldegiko igerilekuetan.

Honez gain, Amorebieta-Etxanon erroldatuta dauden hiritarrei, Lemoako igerileku irekietan abonua eginez gero, Lemoan erroldatuta dauden erabiltzaileei aplikatzen zaien kuota berbera aplikatuko zaie igerilekua erabiltzeko.

Era berean, Amorebieta-Etxanon erregistratuta dauden padel eta futbol areto elkarteei, Lemoako kiroldegiko instalazioak erabiltzeko erreserba eginez gero, Lemoan erregistraturik dauden elkarteei aplikatzen zaizkien baldintza berberak aplikatzen zaizkie.

Irekita dago Larrea kiroldegiko 2018ko uztaileko ikastaroetan izena emateko epea

2018/05/16
• Erabiltzaileek ez dute zertan Larreara joan aurretiko izen-ematea egiteko, eta etxetik gauza dezakete, Internet erabilita.

Ekainaren 13an amaituko da inskripzio epea, eta ekainaren 14an zozketatuko dira ikastarootan dauden lekuak, eguerdiko 12:00etan. Zozketa egin eta gero, 15ean argitaratuko dira lekua duten pertsonen zerrendak, eta ekainaren 22ra arte, gauzatu ahalko dute interesdunek ordainketa.

Gogorarazten da Ametx erakunde autonomoak ezarrita duela eskaintza osatzen duten ikastaroak antolatuko badira, ezinbestekoa dela matrikula egiten dutenen pertsona kopurua guztirako lekuen gehi bat izatea gutxienez.

Interesa duten pertsonek on-line bete ahalko dute, aurretiko-izen-ematea interesa duten  diziplinan edo, bestela, Larrea kiroldegira joanda.

Umeen tanborrada 2018

2018/05/16
Izena emateko epea maiatzaren 21etik ekainaren 8ra arte

Umeen tanborrada 2018ko uztailaren 19an burutuko da.

5-13 urte bitarteko umeak eta gaztetxoak hartu ahal dute parte. (2013-2005 urteetan jaioak)
Izena emateko epea: 2018ko maiatzaren 21etik ekainaren 8ra Gazte Informazio Bulegoan edo online. Izena emateko umea/gaztetxoaren izen-abizenak, jaiotze data eta arduradunaren teléfono zenbakia eman beharko da.

Gorputzak: Sukaldariak, antortxeroak, fusileroak, kantineroak eta tanborreroak.

Izen ematea eta arautegia hemen

Tailer irekia - Euskararen erabileraren inguruko saioa

2018/05/22
Zein da euskararen egoera Amorebieta-Etxanon? Zelan handituko dugu erabilera? Erdu ekainaren 2an antolatuko dugun tailer irekira! 10:00etatik 13:00ak arte, Zelaietan.

Amorebieta-Etxanoko Udalak tailer ireki bat antolatu ekainaren 2an, euskarak gure herrian bizi duen egoeraz hausnartzeko eta etorkizunean har daitezkeen neurriak aztertzeko. Saioa 10:00etatik 13:00ak arte izango da, Zelaietako kontzertu gelan, eta bertan herritarrek hainbat dinamika ludiko egingo dituzte, Elhuyar Aholkularitzaren gidaritzapean.

Amorebieta-Etxanoko Udala Euskara Sustatzeko Ekintza Planaren ebaluazioa egiten ari da, eta, horretarako, parte-hartze prozesu bat abiatu du, zornotzarren ekarpen eta iritziak jasotzeko asmoz. Maiatzeko lehenengo aste bietan online-inkesta bat egon da herritarren eskura, eta hurrengo urratsa tailer ireki hau izango da.

Tailerrera etorriko zarela konfirmatzeko, egizu klik hemen: https://goo.gl/forms/XnXUES5bt7JH3iLn2

Gosari Gozoak - Alex Txikon

2018/05/25
Ekainaren 12an goizeko 09:30ean, Gosari Gozoak ekimenaren 4. saioa izango dugu. Gonbidatu ezaguna izango dugu Urtzan: Alex Txikon mendizalea.

Mendizalea bazara, ezin duzu galdu Gosari Gozoak jardueraren 4. saioa! Ekainaren 12an mendizale ezagun bat izango dugu gurean. Alex Txikon lemoarrak bere azken espedizio eta abenturen berri emango digu Urtza tabernan, goizeko 09:30etik aurrera. Txikon, gainera, Euskaraldiako hamaikako nazionaleko kidea da.

Hau gutxi balitz, Urtza Tabernako Julen Bazek prestatutako pintxoak ere izango ditugu. Julenek saria jaso berri du bere lanagatik.

Erabiltzaileen asebetetze-inkesta Udalaren kirol zerbitzuei buruz

2018/06/05
Ekainaren 5ean hasi, eta hilaren amaierara arte erantzun ahalko dute interesdunek. Larrea kiroldegian eta www.ametx.eus webgunean eman daiteke Udalaren kirol zerbitzuei buruzko iritzia.

Hiritarren aisialdi-ohituren eboluzioari erreparatuta, kirol-jarduerak gaur egun hartu duen garrantzia inoizkorik handiena da, eta horrek erronka izaugarria dakarkigu. Erronka horri, tamaina neurtu eta aurre egin nahian, Amorebieta-Etxanoko Udalak  Ametx erakunde autononomoaren bidez kudeatzen dituen kirol zerbitzuen eta instalazioen gaineko iritzia biltzeko inkesta jarri da bete nahi duten interesdunen esku.

Ekainaren 5ean hasi eta hilaren amaierara arte eman ahalko dute euren iritzia interesdunek, Larrea kiroldegiaren sarreran paperezko formatuan eta www.ametx.eus webgunean: Kirol zerbitzuen inkesta, jarri den galdetegiari erantzunez.

Guztion iritzia garrantzi handikoa delako guretzat, eta zerbitzuen hobekuntza etenik gabean jardun nahi dugulako,

ESKERRIK ASKO zuen interesagatik!

 

Ekainaren 15ean, Euskaraldiaren aurkezpena

2018/06/04
Euskaraldia ekimena Zornotzan aurkeztuko da ekainaren 15ean, 20:00etan, Pike Parketik abiatuta.

Euskaraldia zer den jakin gura baduzu, erdu ekainaren 15ean Pike Parkera! Egun horretan aurkeztuko da Euskaraldia ekimena Zornotzan, 20:00etan Pike Parketik hasita. Pregoi ibiltaria irakurriko da plazaz plaza, musikagaz girotuta. Animatu eta etorri!

Zer da Euskaraldia?

Azaroaren 23tik abenduaren 3ra arte, euskaraz hitz egiten edo ulertzen dugun guztion artean euskaraz egingo dugu. Euskal Herri osoan egingo den ariketa bat da.

Nork antolatzen du?

Euskal Herriko erakunde nagusiak, euskalgintza eta herri-mugimendua elkartu dira ekimen hau antolatzeko: Euskaltzaleen Topagunea, Eusko Jaurlaritza, Nafarroako Gobernua, Aldundiak, AEK, Kontseilua, UEMA, Berria, EHU...

Zelan egingo dugu?

Bi rol izango ditugu aukeratzeko: ahobizi eta belarriprest. Ahobiziek euskaraz egingo dute euskara ulertzen duten guztiekin (nahiz eta batzuetan solaskideak erdaraz erantzun). Belarriprestek euskaraz ulertzen dute, eta eurei euskaraz egitea eskatuko dute, nahiz eta batzuetan erdaraz erantzun. Beraz, parte-hartzeko ezinbestekoa da euskaraz ulertzea.

11 egun horietan, txapa bat eramango dugu soinean. Horrela, jendeak jakingo du “Ahobizi” edo “Belarriprest” garen.

Hau guztia zertarako?

Ariketa honekin gure inguruko pertsonekin ditugun inertziak apurtuko ditugu. Ohitura berriak sortzen baditugu, euskararen erabilera handitzea lor dezakegu. Probatzeko prest?

Zer egin behar da parte hartzeko?

Euskaraldian parte hartzeko izena eman beharko da, irailaren 20tik aurrera. Rola aukeratu beharko da, eta konpromisoa hartu: 11 egunetan euskaraz egingo dut!

Eta Zornotzan zer?

Ariketa hau antolatzeko lantalde ireki bat sortu dugu Zornotzan. Momentuz Euskaraldia zer den sozializatzen ari gara. Ekainaren 15ean aurkezpena egiteko asmoa dugu, 20:00etan, Pike Parketik abiatuta (aurkezpen ibiltaria izango baita).

Melocotones de Viña liburuaren aurkezpena

2018/06/11
Lola López de Lacalle zornotzarrak idatzitako liburua. Ekainaren 13an. 20.00. Auditorioan.

Gerra osteko Errioxan, Pilar eta Paulina sekretu baten jabeak egingo dira. Mahastietan jartzen diran melokotonero zalatariak izango dira, eta haien bien artean sortutako leialtasun sareak elkarrenganako babesa emango die.

Urte batzuk geroagao, bien biloba batek, nahi gabe, non era baten edo bestean, herri osoak zerikusia duen isiltasun akordioa azalaratuko du; emakume xume bi haiek, Pilar eta Paulina, paregabeak zirala erakutsiz..

 

 

 

 

Amorebieta-Etxanon berrikuntzekin hasi da igerilekuen denboraldia: Ganeko aldagelak eta berdegunea handitu dira

2018/06/13
• Aurten igerilekuak bi aste beranduago zabalduko dira Ganeko aldagelak handitzeko egindako lanengatik. Halaber, bi aste beranduago itxiko dira. • Igerilekuen ingurua ere handitu da. Aurrerantzean erabiltzaileek 7.500 m2 gehiago dituen berdegunea izango dute. • Estali gabeko igerilekuak ekainaren 30etik irailaren 30era zabalik egongo dira, 11:00etatik 21:00etara, irailean izan ezik irekita egongo direla 12:00etatik 19:00etara.

Amorebieta-Etxano, 2018ko ekainaren 13a. Amorebieta-Etxanon hasi da igerilekuen denboraldia, Ganeko aldagelak handitu ostean. Astebete eskas gelditzen da kirol gune honetako lanak amaitzeko. Horregatik aurten estali gabeko igerilekuak beranduago zabalduko dira, ekainaren 30ean hain zuzen ere. Era berean, beranduago itxiko dira. Horrela, irailaren 30era arte zabalik egongo dira, 11:00etatik 21:00etara (irailean 12:00etatik 19:00etara). Beraz, estali gabeko igerilekuak 3 hilabetetan zabalik egongo dira, beti bezala.

Aldagelen azpiegitura berria handiagoa eta erosoagoa izango da eta zerbitzu hobe bat eskainiko die erabiltzaile guztiei.

Ganeko aldagela berriak
Igerileku nagusiaren alboan dauden aldagela berriek, sexuaren arabera bereizitako aldagela eta dutxak izateaz gain, hirugarren bloke bat ere badute beheko solairuan, biltegirako eta botikina izateko erabiliko dena. Guztira azalera 452 m2-koa da, hau da, bikoiztu egiten da lehen zegoen espazioa.

Egoteko gunea ere handitu da. Horretarako, hiru eraikinen azalera belar artifizialarekin estaliko da. Honek berdegune hau aprobetxatzeko aukera emango die erabiltzaileei.

Egitura berria hormigoi armatuzkoa da eta fatxada nagusian eraikinerako sarbideak daude. Alboko fatxadek leiho handi bi dituzte eta horri esker argi naturala sartzen da.

Amorebieta-Etxanoko Udalak ingurumena hobetzearen aldeko apustua egin du. Horregatik instalazio berriek ezpal biomasa galdara bat dute, bero-ponpa aerotermiko bat eta eguzki-argiaren kontrolatzaileak.

Berdegunea handitu
Ganeko igerilekuek ekainaren 30etik aurrera 7.500 m2 gehiago dituen berdegune bat izango dute erabiltzaileentzat. Ohiko lekuari ondokoak gehitu zaizkio: igerilekuen alboan dagoen erabilera anitzeko kantxa bat eta hurbil dagoen zuhaizti bat, orain Ganeko gunearen zati izango dena. Erabiltzaileek espazio berri hauek erabili ahal izango dituzte 11:00etatik 21:00etara.

Lan hauek egiteko Udalak 656.000 euroko inbertsioa egin du.

Haizetara fanfarre eta kale musikaren XIII. edizioan, nazioarteko bederatzi banda lehiatuko dira asteburu honetan

2018/06/19
• Jaialdi honen XIII. edizioa ekainaren 22tik 24ra izango da. • Hiru egunetan, Frantzia, Erresuma Batua, Tenerife, Italia, Ciudad Real, Argentina, Catalunya eta Euskadiko taldeak arituko dira Amorebieta-Etxanoko kaleak musikaz eta giro onez betetzen. • Jaialdia lehiaketa bat da eta hainbat sari eskuratzeko lehiatuko dira: bandarik onenaren saria, instrumentistarik onenari saria eta publikoaren saria.

Amorebieta-Etxano, 2018ko ekainaren 19a. Bederatzi nazioarteko bandek parte hartuko dute fanfarre, banda eta kaleko musikaren Haizetara Nazioarteko Lehiaketaren XIII. edizioan. Jaialdia Amorebieta-Etxanon izango da ekainaren 22tik 24ra.
Nazioarteko kaleko musikaren arloan jadanik ezaguna den jaialdi honek musikaz beteko Zornotzako txoko guztiak. Hiru egunetan, Frantzia, Erresuma Batua, Tenerife, Italia, Ciudad Real, Argentina, Catalunya eta Euskadiko taldeak arituko dira Amorebieta-Etxanoko kaleak musikaz eta giro onez betetzen.

Jaialdiak lehiaketa bat du oinarri. Parte hartzaile guztiak banda onenari ematen zaion sariarengatik lehiatzen dira (10.000 €) eta baita instrumentista onenari ematen zaion sariarengatik (1.000 €) ere. Honetarako izendatutako epaimahai espezializatu batek ematen ditu sari hauek eta publikoaren saria, 4.000 euro, herritarren botoekin aukeratzen da.

Haizetara 2018 Prentsa aurrekoa

Musika zuzenean
Fanfarre, banda eta kaleko musikaren lehiaketan, ondoko taldeak egongo dira:

Italiatik eta lehiaketari hasiera emateko, Miwa e i suoi Componenti. Marrazki bizidunik onenetan oinarritutako musika, ska, reggae, disko eta punk ‘n ‘roll erritmoekin entzungo direnak.
Italiatik baita ere Tinto Brass Street Band taldeak Nueva Orleanseko soinuak dakazkigu, antzinako jazz erakargarria, beti gaur egungoa dena.

Kanarietatik datorren taldea, 101 Brass Band, Tenerife iparraldeko hainbat herri lotzen dituen autobus lineari hartu diona izena. Estilo ausart eta freskoa daukate eta lehenengo saria lortu dute  Andorra Sax Festeko Walking Street Festivalean eta Poza de la Salen nazioko txarangarik onenaren sarian birritan bigarren gelditu dira.

New York Brass Band Yorketik dator (UK) eta zazpi kideko taldea da. Indartsua, energiaz betea, perkusioa, tronpetak, tronboiak eta saxofoia ditu. Pastors of Muppets hurbilekoak dira (Saint Paul Les Dax-Frantzia). XX. mende amaierako hard-rocka, heavya eta metala lantzen dituen taldea da.  Balkaneetatik hasi eta Argentinako milonga zein Kolonbiako cumbia, denak dira balekoak Desmadre Orkestarentzat. Talde hau itsasoaren beste aldetik dator, Argentinatik. Ciudad Realgo Dixieland Band taldeak ondoko adierazpen musikalak lantzen ditu: dixielanda, swinga, jazz manouchea… Catalunyako Sidral Brass Band taldea 2011n sortu zen mahasti eta metalezko noten artean. Hamaika musikarik osatutako Kataluiniako talde honek kolorea jarriko dio jaialdiari Red Wine Cabaret bere ikuskizun berriarekin. Bertakoak ere egongo dira. Hain zuzen ere Traperistak banda bizkaitarrak txatarra eta etxetresna zaharrak erabiltzen ditu soinuak eta musika tresna berriak sortzeko.

Banda gonbidatu bezala, lehiaketatik kanpo parte hartuko du Frantziako ACCOUSTEL GANG bandak. Talde hau jaialdiaren edizio batean egon zen eta arreta deitzen du Steel drumsen erabilerak (izateaz Jamaikako perkusio teknika bat da). Eta, zelan ez, herriko KITTU taldea, duela gutxi sortutako taldea, ohiko musika tresnak erabiltzen dituena.

Musikaz gain, gastronomia ere jaialdi honetako protagonistetariko bat da. Lehiaketa egunetan, lau gune gastronomiko egongo dira Amorebieta-Etxanoko hainbat plazatan: Zelaieta parkea, Zubiondo plaza, Gernika plaza eta herriko plaza.

Ekintza osagarriak
Haizetarak musika emanaldiez gain, hainbat ekintza osagarri ditu egun horietan, esaterako José Hornaren “Jazz for two” argazki erakusketa. Erakusketa hau ekainaren 20tik 30era egongo da ikusgai Zelaieta Zentroan. Eszenan elkarri egindako begiradak, elkarrizketa esplizituak eta kontrasteak bilduko dira.
Gainera, ekainaren 20an 19:30ean Zelaieta Zentroan “Katxarrismos” hitzaldi-kontzertua emango du Augusto Gonzálezek. Hitzaldi honekin, Gonzalezek musika tresna guztietatik ibilbide bat egingo du eta bere sortze lanerako materialak berrerabili eta birziklatzeari buruz hitz egingo du.

Jam session bi ere antolatu dira (ekainaren 22 eta 23an) Harrison Hoteleko terrazan. Elsa Lizundia saxofoi-jotzaile bizkaitarrak gidatutako Girls in Banda laukoteak joko du egun hauetan (lau neskak osatzen dute taldea).

Foru Aldundiak eta Amorebieta-Etxanoko Udalak babestutako programa honek enpresa pribatu, erakunde eta herriko txokoen laguntza ere jasotzen du.

Haizetara
Haizetara jaialdia duela hamabi urte sortu zuen Amorebieta-Etxanoko Udalak. San Juanen inguruko asteburu batean izaten da hitzordua. Izan ere, herriko artxibo historikoetan jasota dagoenaren arabera, sasoi honetan ohikoa izaten zen kalean musika entzutea. Jaialdi honekin Udalak XX. mende hasieran musika San Juan suarekin lotzen zuen jai-giroa berreskuratu nahi du. Honek berebiziko garrantzia izan zuen batez ere 1913. urte inguruan.
Herrikoak eta eskualde guztikoak erakarri nahi ditu Haizetara jaialdiak. Musikaren arloan dabiltzanei ere zuzenduta dago, jaialdiaren bidez munduko beste leku batzuetan kaleko musika taldeek zer egiten duten ezagutzeko eta azken joerak eta joera berritzaileak ezagutu ditzaten.

Informazio gehiago: www.haizetara.com

Haizetara 2018 Prentsa aurrekoa

Haizetara 2018 Prentsa aurrekoa
Jatorrizko tamainako irudia: 56 KB | Irudia ikusi Ikusi Irudia deskargatu Deskargatu

Amorebieta-Etxanoko Zubiaur Musika Eskolak kontzertu bi eskainiko ditu ikasturtea amaitzeko

2018/06/19
• Amorebietako Udal Musika Eskolak ikasturtea amaitzeko antolatu du egitarau hau. • Kontzertuak ekainaren 20an eta 21ean izango dira. • Kontzertuak Zornotza Aretoan eta Herriko plazan izango dira.

Amorebieta-Etxano, 2018ko ekainaren 19a. Amorebieta-Etxanoko Zubiaur Musika Eskolak kontzertu bi eskainiko ditu 2017/2018 ikasturtea amaitzeko. Lehenengoan ikaslerik gazteenek parte hartuko dute (4-8 urte) eta ekainaren 20an, asteazkena, izango da, 18:00etan Zornotza Aretoan.

Bigarrena, ekainaren 21ean izango da, hain zuzen ere Musikaren Europako Egunean eta Herriko plazan izango da, 19:00etan. Kontzertu honetan txistu, trikitixa eta konbo taldeak egongo dira, hainbat musika tresna entzuteko aukera egongo delarik.

Pastors of Muppets Haizetara 2018ko banda irabazlea

2018/06/25
• Talde frantziarra 9 taldeetatik aukeratua izan da epaimahaiaren eskutik. • Publikoaren sari berezia Traperistak bandarentzat izan da. • Sergi Torrents hautatu da instrumentistarik onena.

Amorebieta-Etxano, 2018eko ekainaren 25a. Haizetara 2018 arrakasta handiarekin amaitu da jada. Milaka pertsona hurbildu ziren Amorebieta-Etxanora parte hartu duten taldeen musikaz gozatzeko.

Haizetara Amorebieta-Etxanoko banda eta kaleko musikaren jaialdiko hamairugarren edizioaren lehiaketako sariak ondorengoak izan dira:

  • Lehiaketaren sari nagusia (izen ezagunek osatutako epaimahaiak erabakia): Pastors of muppets (Frantzia). 10.000 euroko saria.
  • Ikusleen sari berezia (herritarrek erabakia): Traperistak (Euskadi). 4.000 euroko saria.
  • Instrumentistarik onenarentzat saria 1.000 euroko saria (sari nagusia ematen duen epaimahai berak erabakia) Sergi Torrents musikariari.
  • Accesit-a New York Brass Band.

Marmitako txapelketa 2018

2018/07/17
Izena emateko epea ekainaren 27tik uztailaren 13ra Izen emateko aurreko urtean bezala Ametx Txartela aurkeztu behar da Txapelketa uztailaren 21ean izango da

PLANOA

ZOZKETAREN EMAITZAK

1 Amorebietako jaietako kuadrilen arteko marmitako lehiaketa/txapelketa uztailaren 21ean egingo da Zubiondo plazaren inguruan.

2 Herriko edozein koadrilak parte hartu ahal izango du, aurretik Zelaieta Zentroan izena ematen badu. Izen ematea astelehenetik ostiralera 8:30tik 21:30ra izango da, eta uztailaren 13an eguerdiko 13:00etan amaituko da.

3 Mahai-lagunak eta banatutako mahai eta aulkien kopurua ahalik eta zehatzen aurreikusteko, eta lehiaketaren garapen egokirako, izena ematerakoan, kuadrila bakoitzeko kide batek AMETX txartela izan eta aurkeztu beharko du. Pertsona hori mailegatutako materialaren arduraduna izango da eta materiala ez jasotzea, ez itzultzea, edo egoera ez egokian itzultzekotan hurrengo zenbatekoen arabera ordaindu beharko ditu:

Mahaia: aleko prezioa 30€

Aulkia: aleko prezioa 20 €

Bestelako zigorrak: 50€

 Zigorra jarriko da honako egoera hauek gertatuz gero:

-  Mahai-lagun baino askoz mahai eta aulki gehiago egonez gero.

-  Materialaren ez entregatzea orduan eta beharrezko lekuan edo materiala egoera okerrean bueltatzea.

-  Antolatzaileek banatutako tokien mugak errespetatu ezean.

-  Arautegian agertzen ez den antolatzaileek erabakitzen duten beste edozer

4 Lehiaketako/txapelketako koadrilei egokitu zaizkien tokiak zozketatu egingo dira. Zozketa jendeaurrean egingo da Zelaietako Auditorioan, uztailaren 18an, asteazkena, eguerdiko 12:00etan. Guneak pertsona kopuruaren arabera sailkatuko dira eta kategoria desberdinetan zozketatuko dira: A talde txikiak, B talde handiak eta C Challengeko taldeak. Kuadrila bakoitzak zozketan esleitutako tokia erabili beharko du derrigorrez.

5 Antolatzaileek hegaluzea, mahai-tresneria eta ogia BAINO EZ diete emago Challengen parte hartuko duten koadrilei. Mahaiak eta aulkiak planoan agertzen den lekuan hartu eta bueltatu beharko dira hurrengo ordutegia errespetatuz. Hartu: 10:30 – 13:00; bueltatu: 13:00 – 19:30.

6 Koadrilek, antolatzaileen azalpenak kontuan hartu beharko dituzte uneoro, batez ere lapikoak entregatzeko ordutegia eta lekua.

Sari banaketa 14:30etan izango da.

Lapikoak gehienez, 25 zm-ko diámetroa izan dezakete.

7 Txapelketan/lehiaketan zehar sortu litekeen edozein arazo konpontzeko Batzorde Antolatzailea izendatuko da AMETXeko bi kide eta kuadrila antolatzaileko beste bi kideek osatuta.

Udalak udako hilabeteetan irakurketa sustatzeko programa jarri du martxan

2018/06/27
• Udal liburutegiak Itsu-Itsuan egitaraua antolatu du, liburu bat “itsuan” aukeratzeko, haren egilea edo izenburua ezagutu barik. • Helburua, liburuak aukeratzeko betiko moduekin apurtzea eta udan irakurketa sustatzea da. • Ekainaren 28tik irailaren 15era, Zornotzako liburutegiko hainbat liburu bilduta egongo dira, eta irakurleei euren aukeraketan gidatzeko zenbait pista izango dituzte. • Egitarauan parte hartzen dutenak, Zinemaldia 2018ko film baterako bi sarreren zozketan sartuko dira.

Amorebieta-Etxanon, 2018ko ekainaren 27an. Ametx erakunde autonomoak Itsu-Itsuan jarri du martxan, Udal liburutegiak udarako antolatu duen irakurketa programa. Ekimenaren helburua udako hilabeteetan irakurketa sustatzea eta herritarrei ohikoak ez diren literatura proposamenak irakurtzen animatzea da. Ekainaren 28tik irailaren 15era, Zornotzako liburutegiko hainbat liburu bilduta egongo dira, eta irakurleei euren aukeraketan gidatzeko zenbait pista izango dituzte.

Programan, liburu bat aukeratuko da, bildukinean agertzen diren pistei jarraituz. Liburuak aukeratzeko betiko moduekin apurtzea eta bestela aukeratuko ez liratekeen liburuei aukerak ematea bilatzen da. Aukeraketarako metodo sistematikoak berriztatzeko modua da; literatura arloko abentura bat, hitzordu itsua liburu batekin.

Horretarako, parte hartzaileek ez dute ezagutuko liburuaren egilea ezta izenburua, liburua ezkutatzen duen bildukinean markatuta dauden pistak baino ez.

Irakurketa atseginerako aukerak bideratzeaz gain, programa honetako liburu bakoitzean fitxa bat sartu da, irakurleek, labur, liburuarekin izan duten topaketa atsegina izan den ala ez esan eta sortutako esperientzia azal dezaten. Fitxa hori Liburutegiko kutxa batean utziko da, eta Zinemaldia 2018ko film baterako bi sarreren zozketan sartuko da.

Programa, Euskadiko Irakurketa Sare Publikoko edozeinentzat dago zabalik. Beraz, parte hartzeko baldintza bakarra EAEko edozein liburutegiko irakurketa karneta edukitzea izango da.

Marmitako Egunean, Euskaraldia su txikian!

2018/07/03
Uztailaren 21ean Euskaraldiaren simulakroa egingo dugu Zornotzan: Marmitako Egunean euskaraz egiteko prest? Eman izena eta “Ahobizi” edo “Belarriprest” rola aukeratu!

Patatak, atuna, tipula, porrua, tomatea, berakatza, olioa, gatza, piperra eta… “ahobizi” edo “belarriprest”! Aurtengo Marmitako Eguneko errezetak osagai berri bi izango ditu. Uztailaren 21ean Euskaraldiaren simulakroa egingo dugu, euskararen erabilera bultzatzeko asmoz.

Euskaraldia azaroaren 23tik abenduaren 3ra arte antolatuko da Euskal Herri osoan, baita Zornotzan ere. Bertan, herritarrek rol bi izango dituzte aukeratzeko: “ahobizi” (euskaraz berba egingo dute ulertzen duten guztiekin) eta “belarriprest” (euskaraz ulertzen dute, eta eurei euskaraz berba egitea nahi dute, nahiz eta batzuetan erdaraz erantzun). Herritarrek txapa bat eramango dute soinean 11 egun horietan.

Marmitako Egunean, beraz, Euskaraldiaren proba egingo da. Herriko hiru puntu ezberdinetan mahaitxoak jarriko dira, eta zornotzarrek izena eman ahal izango dute Euskaraldian parte hartzeko. “Ahobizi” edo “Belarriprest” konpromisoa aukeratu, argazkia atera, eta pegatina bat emango zaie, soinean eramateko.

Euskaraldian parte hartu gura duzu? Bada, sartu www.zornotzarrak.eus webgunean eta eman izena!

Enrike Renteria pintura-lehiaketaren XXI. edizioa egingo da Amorebieta-Etxanon

2018/07/05
• Lehiaketak bi modalitate ditu: aire zabaleko pintura-lehiaketa tradizionala eta “Zintzilik” lehiaketa, herriko balkoietan ikusgai jartzen den obra onena saritzeko. • Epaia uztailaren 8an (igandea) jakinaraziko da, 18:00etan, Zelaieta Zentroko entzunaretoan. • Pintore zornotzar ezaguna Euskal Artisten Elkarte ospetsuko kide izan zen.

Amorebieta-Etxano, 2018 uztailaren 4a. Amorebieta-Etxanok omenaldia egingo dio beste urte batez bertako herritar ospetsuenetako bati, Enrike Renteria pintoreari. Zehazki, igande honetan, uztailaren 8an, XXI. “Enrike Renteria” Pintura Lehiaketa egingo da. Lehiaketa Zornotza Arte eta Kultura Elkarteak antolatu du, Ametx kulturaren udal-erakundeak lagunduta.

Lehiaketak bi modalitate ditu: aire zabaleko pintura-lehiaketa eta “Zintzilik”, herriko balkoietan ikusgai jartzen den obra onena saritzeko lehiaketa. Balkoietako obra horiek lehiaketaren eguna baino lehen egin behar dira eta gaurtik aurrera ikusgai jarri Amorebieta-Etxanoko balkoietan. Bertan geratuko dira herriko jaiak amaitu arte.

Lehiaketa tradizionala
Lehiaketa tradizionala edo “aire zabalekoa” uztailaren 8ko goizean egingo da Amorebieta-Etxanoko kaleetan. Lehiaketa honen bidez, artistek herriko hainbat txoko pintatuko dituzte, bertatik pasatzen direnen eta ikusmiratzaileen begien bistan.

Aurreko edizioetan bezala, antolatzaileek espero dute herriko eta nazio-mailako 30 artista baino gehiagok parte hartzea. Lehiakide bakoitzak obra bakarra aurkeztu ahal izango du, eta teknika eta neurriak libreak izango dira.

Lehiaketa honetarako, antolatzaileek epaimahai bat osatu dute. Bertako kideak irakasleak, artistak eta diseinuaren arloko profesionalak izango dira, eta aurkeztutako obren kalitatea eta originaltasuna baloratuko dituzte. Epaia igandean jakinaraziko da, 18:00etan, Zelaieta Zentroko entzunaretoan.

Guztira zazpi obra sarituko dira: lehen saria 500 eurokoa izango da; bigarrena 400 eurokoa; hirugarrena 350 eurokoa; eta laugarrena, bosgarrena eta seigarrena 300 eurokoak. Horrez gain, 200 euroko accesit bat egongo da saririk jaso ez duen herriko obra onenarentzat.

Haurren atalean (14 urtetik beherakoentzat), lehen saria asto bat eta pintura-maleta bat izango da, eta bigarren eta hirugarren gelditzen direnek, berriz, pintura-maleta bana jasoko dute.

Saritutako obra guztiak antolatzaileen esku geratuko dira eta Zelaieta Zentroko erakusketa-aretoan jarriko dituzte ikusgai uztailean zehar.

Zintzilik
Horrez gain, igandean, 18:00etan, “Zintzilik” arte-lehiaketaren epaia ere jakinaraziko da. Lehiaketa horretan herriko balkoietan ikusgai jartzen diren obra onenak saritzen dira.

Izena emateko unean, parte-hartzaileei 1,30 x 1,50 metroko olana bat eman zitzaien. Gaia librea da eta eguraldi txarrarekiko erresistenteak diren pinturak erabili behar dira; izan ere, obrak Amorebieta-Etxanoko herriguneko balkoietan jarriko dira.

Epaimahaia hainbat artistak eta diseinuaren arloko profesionalek osatuko dute, eta aurkeztutako obren kalitatea eta originaltasuna baloratuko dituzte.

Lau sari banatuko dira parte-hartzaileen artean: lehen saria 400 eurokoa izango da, bigarrena 300 eurokoa, hirugarrena 200 eurokoa eta tokiko beste sari bat egongo da, 200 eurokoa.

Enrike Renteria
Enrike Renteria Mardaraz 1900eko otsailaren 9an jaio zen, Larrean, Amorebieta-Etxanon. Autodidakta zen, eta Kaitanako eskolan zebilenean hasi zen pintatzen. 1924an Juan Gorbea eta Luis Iceta, Athleticeko kapitaina, bere talentuaz jabetu ziren, eta haren obra erakutsi zieten Isidoro Guinea eta Antonio de Guezala pintoreei.  Urte horretan bertan Euskal Artisten Elkartean sartu zen eta bertako kide izan zen 1937an elkartea desegin arte.

 

Renteria bokazioz izan zen pintorea. Bizitza osoan zehar jarrera horri heldu zion eta gogor borrokatu zuen pintatzen jarraitzeko. Hala, pintura-jardunari erabat lotuta, naturaren berezko ñabardurei arreta handia jarri zien beti. Distira edo isla bat, euriaren hezetasuna, egunsentiko lainoa edo sartzen ari den eguzkiaren berotasuna ikus daitezke, besteak beste, haren koadroetan. Aire zabalean lan egiten zuen, ñabardura bakoitza jasoz.

Emakume solidario talde bat izango da 2018ko Karmengo jaien pregoilaria

2018/07/05
• Ongi Etorri Errefuxiatuak, Cáritas, Udalen, Kidenda eta Asociación Española contra el Cáncer elkarteetako bost ordezkarik irakurriko dute aurtengo jaietako pregoia. • Helburua, emakumeak gure gizartean betetzen duen lekua balioztatzea eta bere esfortzua eta lana ikusgai bilakatzea da. • Doctor Deseo, Reincidentes, Zea Mays, edo Hesian izango dira jaietan arituko diren taldeetako batzuk. • Danborrada, marmitako lehiaketa eta kontzertuak jaietako ekitaldi azpimarragarrienetako batzuk baino ez dira. • Antzerkiak, bere adierazpen anitzetan (kalekoa, umeei zuzendutakoa…), dantzak eta arte eszenikoek, orokorrean, oso leku garrantzitsua beteko dute jaietako programazioan. • Amorebieta-Etxanoko Udalak eraso sexistarik gabeko jaiak gura ditu. Eta ez jaiak bakarrik, baita eguneroko jarduna ere. Horregatik, uztailaren 15ean, 20an eta 21ean Beldur barik espazioa instalatuko du Ixerbekoan.

Amorebieta-Etxanon, 2018ko uztailaren 5ean. Aurtengo Karmengo jaiak atean ditugu, eta adin eta gustu guztietarako jardueraz betetako egitarauarekin datoz. Uztailaren 14tik 22ra, helduek eta txikiek musika hoberenaz, kaleko antzerkiaz, herri kirolez, koadrilen jarduerez eta gastronomia lehiaketez gozatu ahal izango dute, beste gauza askoren artean.

Uztailaren 15ean, arratsaldeko 20:00etan, jaiez, kolorez eta umore onez betetako egunei jarraipena emango dieten txupinazoa eta pregoia izango ditugu. Karmengo jaiak uztailaren 27an ospatuko den Santanatxu egunarekin bukatuko dira. Jardueraz betetako eguna, jaiei amaiera bikaina emateko.

Pregoilariak
Aurten, pregoia “emakume solidarioek” botako dute. Gizarte arloko Ongi Etorri Errefuxiatuak, Cáritas, Udalen, Kidenda eta Asociación Española contra el Cáncer elkarteak ordezkatzen dituzten emakume talde batek. Helburua, emakumeak gure gizartean betetzen duen lekua balioztatzea eta bere esfortzua eta lana ikusgai bilakatzea da.

Kaleko musika eta kontzertuak
Kaleko musikak eta kontzertuek kolore ukitua jarriko dute Karmengo jaietan. Larunbatean, uztailaren 14an, Doctor Deseo taldeak musikaz eta giro bikainaz beteko du Zubiondo plaza.

Erromeriak ezinbestekoak dira jai guztietan, eta horrela erakutsiko du Zirkinik Bez taldeak Ixerbekoako agertokian uztailaren 14an, larunbatean.

Igandean, uztailaren 15ean, Gaztediko Gaiteroak, Kittu, Alex eta Lander trikitilariak eta Always Drinking Marching Band kaleko banden soinuek erritmoz beteko dituzte Amorebieta-Etxanoko kaleak. Musika jardunaldiak Ixerbekoako agertokian egongo diren Wicked Wizzard eta Reincidentes rock taldeen eta Zubiondo parkean arituko den Los Panchos taldearen emanaldiekin izango du jarraipena.

Astelehenean Alain Concepción Zubiondo plazan egongo da gaueko 22:00etan.

Asteartean, uztailaren 17an, Guda Dantza eta Itaca Band taldeek erritmoz beteko dute Zubiondo plaza. Ruper Ordorika izango da asteazken gaueko protagonista, Zelaieta parkean kolore ukitua jarriz. Eta ostegunean, Zornotzako ikus-entzuleek Puro Relajo taldearen emanaldiarekin gozatu ahal izango dute.

Uztailaren 20a, ostirala, jardueraz beteta egongo da. Arratsaldeko lehen ordutik, Amorebieta-Etxanoko herritarrek Orkresta Elektrotxarangaren eta Zea Mays, Inun eta Adriana Gaultier DJ taldeen emanaldiez gozatu ahal izango dute.

Bariku horretan bertan izango dira danborrada tradizionala eta Txistulari Kontzertu Handiaren XIX. edizioa. Aurtengoa ikuskizun berezia izango da; artista gonbidatuak Kutxi Romero eta AIDAE taldea izango dira.

Kaleko musika izango da larunbateko eta igandeko ikuskizun nagusietakoa. Urrutia anaiek, Kittuk eta Irulitxa fanfarreak, beste batzuen artean, alaituko dituzte egun horiek. Gauez ere erritmoa ziurtatuta egongo da. Larunbatean London orkestra eta Hesian eta Batek Daki rock taldeak izango ditugu gurekin.

Uztailaren 22an, igandean, Ze Esatek! taldea izango da gaua alaituko duena.

Santanatxu eguna, uztailaren 27a, ere musikaz eta giro bikainez beteta egongo da. Musika emanaldiak egunez eta gauez. Havana 537 taldeak emango die amaiera Amorebieta-Etxanoko jaiei.

Kirol jarduerak
Karmengo jaiek eta Santanatxu egunak nagusiei eta txikiei zuzendutako kirol jarduera ugari eskainiko dituzte: herri kirolak, xake txapelketa, arku tiraketa lehiaketa, pitxoi tiraketa, saskibaloia… jaiez egunez gozatzeko jarduera asko eta asko.

Jaietako lehenengo zapatuan txikienek Umeentzako arrantza lehiaketan eta Duatloi txikian parte hartu ahal izango dute. Egun horretan bertan bizikletaren eguna ospatuko da, Urgozo Txirrindulari Elkarteak garraio mota horren erabilera bultzatzeko sustatutako ekimena.

Esku pilota eta pala lehiaketek protagonismo berezia izango dute Karmengo jaietan. Igandean, uztailaren 15ean, modalitate horietako emakumeen txapelketaren II. edizioa jokatuko da. Astelehenean, uztailaren 16an, udal pilotalekuan pilota partiduak jokatuko dira, Agirreamalloa-Oliden vs Carregal-Ibarloza eta Urrutikoetxea-Larunbe vs Bengoetxea-Albisu bikoteen artean. Santanatxu egunean, berriz, herriko XI. esku pilota txapelketa jokatuko da. Udalak herritar guztiei luzatzen die txapelketa herrikoi horretan parte hartzeko gonbidapena.

Ostegunean, uztailaren 19an, koadrilen arteko piragua jaitsiera tradizionala izango da, nagusiek eta txikiek asko gozatzen duten jarduera klasikoa.

Uztailaren 21ean, larunbatean, bi hitzordu garrantzitsu izango ditugu kirolarekin. 17:00etan, xake zaleek Xake Txapelketaren XXXVII. edizioan parte hartu ahal izango dute, eta 21:00etan jaietako VIII. bolo txapelketa jokatuko da. Hurrengo egunean, Zubiondo parkean, Amorebieta-Etxanoko VII. milia ospatuko da. Herritar guztiei zuzendutako lasterketa herrikoia.

Santanatxu egunak emango die amaiera jaiei. Egun horretan jokatuko da Amorebieta-Etxanoko Udalaren VII. Futbol Txapelketa.

Kaleko antzerkia eta jarduera herrikoiak
Ohikoa denez, antzerkiak, bere adierazpen anitzetan (kalekoa, umeei zuzendutakoa…), dantzak eta arte eszenikoek orokorrean, oso leku garrantzitsua beteko dute jaietako programazioan. Uztailaren 17an, Ganso y Cía konpainiak bertaratutako guztiak alaituko ditu “Babo Royal” ikuskizunarekin. Egun horretan bertan, Maduixa dantza konpainiak, Umore Azoka 2017 irabazi zuen “Mulïer” ikuskizuna eskainiko du.

Asteazkenean, uztailaren 18an, Markeliñe taldeak umeei zuzendutako ikuskizun berezia eskainiko du: “Chef Nature” antzezlana, erritmoz, keinuz eta irudimen askoz betetako aire zabaleko jatetxea. Ostegunean Trapuzaharra konpainiaren “Sefini” ikuskizunaren txanda izango da.

Uztailaren 16an, astelehenean, zornotzarrek bertsolaritza saio bereziaz gozatu ahal izango dute. 21:30ean, Herriko plazan, Etxahun Lekue, Oihana Iguaran, Arkaitz Estiballes eta Maddalen Arzallus bertsolariak arituko dira.

Jarduera herrikoiek ere protagonismo berezia izango dute Karmengo jaietan eta Santanatxu egunean. Koadrilen ginkana, kalejirak, txikienentzako jolasak eta jarduerak, marmitako lehiaketa gastronomiko handia, danborrada txikia, erakusketak, baserriko produktuen azoka… izango dira uztailaren 14tik 27ra luzatuko diren jardueretako batzuk. Aitite eta amamek ere eurei zuzendutako eguna izango dute, uztailaren 22an, igandean. Egun hori mezarekin hasiko da, eta bertsolaritzarekin, dantzekin eta euskal erromeriarekin jarraituko du.

Erasorik gabeko jaiak
Amorebieta-Etxanoko Udalak eraso sexistarik gabeko jaiak gura ditu. Eta ez jaiak bakarrik, baita eguneroko jarduna ere. Horregatik, uztailaren 15ean, 20an eta 21ean Beldur barik espazioa instalatuko du Ixerbekoan. Stand horretan, hala gura duten herritarrek indarkeria eta eraso sexisten aurreko informazioa eta aholkuak lortu ahal izango dituzte. “Zornotzako jaietan ere eraso sexistarik ez! Erasotzaileak kanpora” goiburupean, Amorebieta-Etxanoko Udalak berdintasunaren, errespetuaren eta tolerantziaren balioak azpimarratu gura ditu.

Leku horretan, aholkuak eta informazioa emateaz gain, txapak, pegatinak, eskumuturrekoak, informazio gidak, galdetegiak eta kartelak ere banatuko dira.

Yohana Soldevilla eta Iñaki Olabarri Enrike Renteria pintura-lehiaketaren XXI. Edizioaren irabazleak

2018/07/09
• Lehiaketak Enrike Renteria margolari ospetsua omentzen du • Lehiaketa Zornotza Arte eta Kultura Elkarteak antolatu du, Ametx kulturaren udal-erakundeak lagunduta.

Amorebieta-Etxano, 2018ko uztailak 9. Yohana Soldevilla eta Iñaki Olabarri Enrike Renteria pintura-lehiaketaren XXI. Edizioaren irabazleak. Lehiaketak bi modalitate ditu: aire zabaleko pintura-lehiaketa eta “Zintzilik”, herriko balkoietan ikusgai jartzen den obra onena saritzeko lehiaketa. Balkoietako obra horiek lehiaketaren eguna baino lehen egin behar dira eta gaurtik aurrera ikusgai jarri Amorebieta-Etxanoko balkoietan. Bertan geratuko dira herriko jaiak amaitu arte.
Lehiaketa Zornotza Arte eta Kultura Elkarteak antolatu du, Ametx kulturaren udal-erakundeak lagunduta.

Lehiaketa tradizionalaren irabazleak
- 1. Saria, 500 euro: Yohana Soldavilla (Viana).
- 2. Saria 400 euro: Juan Carlos Lang (Bilbao).
- 3. Saria 350 euro: Ricardo Azkagorta (Bergara)
- 4. Saria 300 euro: Iker Mugarra (Zeberio)
- 5. Saria 300 euro: Juan José Altuna (Bergara)
- 6. Saria 300 euro: Lucio Fernandez de Miguel (Vitoria)
- Accésit-a: Pablo Gil y Alberto García.

14 urte baino gutxiagoko irabazleak
- 1. saria: Luken Ruiz (Bedia)
- 2. saria: Maialen Ruiz (Bedia)
- 3. saria: Peru Retenaga (Amorebieta-Etxano)
- 4. Saria: Gari Retenaga (Amorebieta-Etxano)

Zintzilik irabazleak
- 1. Saria, 400 euro: Iñaki Olabarri.
- 2. Saria 300 euro: Alberto García Sánchez (Amorebieta-Etxano)
- 3. Saria 200 euro: Quintina Torres (Amurri)

Udalak Euskara Sustatzeko Ekintza Planaren (ESEP) ebaluazioa eta diagnostikoa egin du

2018/07/12
Euskara Zerbitzuak martxan jarritako prozesu parte-hartzailean zornotzarren iritzi eta ekarpenak jaso dira.

Amorebieta-Etxanoko Udalak Euskara Sustatzeko Ekintza Planaren (ESEP) ebaluazioa eta diagnostikoa egin du. Elhuyar Aholkularitzaren gidaritzapean, Udalak orain arte egindako lanaren nondik norakoak aztertu ditu: euskararen transmisioan, sentsibilizazioan, aisialdian... Ebaluazio eta diagnostiko hau egiteko ezinbestekoa izan da zornotzarren parte-hartzea. Hiru modutara gauzatu da parte-hartzea: elkarrizketa sakonak, on-line inkesta (220 zornotzarrek bete dute) eta tailer ireki bat.

Eskerrik asko prozesu honetan parte hartu duzuen guztioi. Diagnostiko honekin, hurrengo ESEP egiteko oinarriak zehaztu dira.

Dokumentua irakurtzeko egizu klik hemen.

"Zornotza 11 kolore" kalejira Santanatxu egunean

2018/07/25
Uztailaren 27an, Santanatxu egunean, kultur aniztasunaren aldeko kalejira egingo dugu Zornotzan lehen aldiz. 19:30ean Ganeko frontoitik abiatuko da.

Zornotzan dugun kultur aniztasuna aldarrikatzeko asmoz, "Zornotza 11 kolore" kalejira antolatuko da uztailaren 27an, Santanatxu egunean. Hitzordua 19:30ean izango da, Ganeko frontoian, eta kalejira Zelaietan amaituko da. Ekimen honetan herriko eragile eta kultur elkarteek parte hartuko dute: Euskaraldia, Ongi Etorri Errefuxiatuak, gazteen koadrilak...

Animatu eta parte hartu!

Zelaietako egitaraua 2018ko iraila-abendua

2018/08/31
Jadanik kalean dago abendura arteko Zelaietako programazioa dakarren eskuorria: ikastaroak, ume eta gazte ekintzak, erakusketak, libututegia… Ikastaroetan izena emateko epea datorren irailaren 3an hasten da.

Egitaraua jeisteko HEMEN klikatu.

Amorebieta-Etxanoko euskaltegien 2018-2019 ikasturteko matrikula-aldiaren hasiera

2018/09/04
Amorebieta-Etxanoko Udalak, Zornotza Udal Euskaltegiak, AEK-k eta Zornotzako Barnetegiak hasiera eman diote 2018-2019 ikasturteko matrikula-aldiari.

Amorebieta-Etxanoko Udaleko kultura zinegotzia den Luciano Martínezek; Idoia Zuloagak, Zornotza Udal Euskaltegiaren zuzendariak; Maribi Zubiagak, Zornotzako Barnetegiaren zuzendariak eta AEK-ko udalerriko arduraduna den Igor Landalucek, zornotzar guztiak deitu nahi dituzte aurtengo ikastaroetan matrikulatzera.

Zornotzako Barnetegiaren hileroko ikastaroen eskaintzaz gain, udalerriko Zornotza Udal Euskaltegiak, eta Zornotzako AEK-k jardun ezberdineko ikastaroetan matrikulatzeko aukera ematen diete zornotzarrei baita maiztasunaren aldetik ere: egunero astelehenetik eguenera, astean bi egunetan… Udako trinkoak edo iraileko eskaintza ahaztu gabe.

Helburu nagusia euskara ikastea izanik, eskaintza ikasleei bideratua izango da. Horretarako, besteak beste, xede berezietarako taldeen aukera izango da (guraso taldeak, nagusientzako taldeak…), baita maila lortzea helburu duten taldeena ere.
Amorebieta-Etxanoko Udalak udalerrian erroldatuta dauden euskara ikasleentzako diru-laguntzak ematen ditu. Eskariak urrian, ikasturtea amaitutakoan, aurkeztu ahal izango dira.

Horrez gain, Euskara Zerbitzuak antolatua eta euskaraz berba egitea helburu duen Berbaldiak programan izen-ematea ere urrian izango dela jakinarazi du.

Luis Miguel Gómez, Koldo Etxebarria eta Jesús Lizaso artisten lanek osatzen dute Aldundiak sustatzen duen Bosteko-ren XXI. edizioa

2018/09/06
Hiru artista bizkaitarren erakusketaren komisarioa Iñigo Sarriugarte Gómez da eta izena “Isilunearen poetikak, oihartzuna sortzen duten esentziak - Poéticas del silencio, esencias en resonancia” da. Bosteko-k, berriz ere, Bizkaia zeharkatuko du eta ekitaldiaren hasiera Amorebieta-Etxanon izango da, irailaren 6an; ostean Arrigorriaga, Leioa, Basauri eta Getxo bisitatuko ditu.

Bosteko-ren  hamaikagarren edizioa hasten da, Bizkaiko Foru Aldundiak sustatzen duena eta  era koordinatuan Bizkaiko bost herritan  garatuko dena.

“Isilunearen poetikak, oihartzuna sortzen duten esentziak - Poéticas del silencio, esencias en resonancia” da edizio berri honetan proiektuak hartu duen izena. Erakusketak bilaketa barneratuaren egoera irudikatzen du, baina ez bakarrik artistarengandik, aldi berean ikuslea ere  berariazko ibilbidean murgiltzera, izaki guztien  sakoneneko esparruarekin kontaktu estua edukitzera gonbidatzen duelako. Horregatik hautatu diren proposamenak ezin dira bakarrik gozamen poetikotik eta estetikotik ikusi, derrigorrez  behar dutelako gogo-aldartearen izaerako komunikazioa. Bosteko 2018ren barruan hiru artista bizkaitar hauen obrak biltzen dira, Luis Miguel Gómez, Koldo Etxebarria  eta Jesús Lizaso, eta erakusketaren komisarioa Iñigo Sarriugarte Gómez da.

Luis Miguel Gómez (1955ean jaioa), Koldo Etxebarria (1960)  eta Jesús Lizaso (1961) artisten obrek ez dute bakardade sozial edo indibidualizatuan sakontzen, egiten duten gauza bakarra buru-murgiltze baten bidea eskaintzea da, hain zuzen ere bakardade isilaraziaren halo batez estaltzen dena eta ikuslea bere barruko garrantzi propiora  eramaten duena.

Beste edizio batzuetan gertatu ez den bezala, hau da, komisarioek artistak aukeratu zituztenean, aurtengo edizioan sortzaileak izan ziren komisarioarengana jo zutenak proiektu bati forma emateko eskatuz, eta hori izan da azkenean erakusketan gauzatu dena.

Erakusketa ibiltari hau irailaren 6an hasiko da Amorebieta-Etxanoko Zelaieta Zentroan; bertan ikusgai egongo da irailaren 23ra arte eta ostean Arrigorriagan (Euskaldun Berria Erakusketa Aretoa, irailaren 25etik urriaren 14ra), Leioan (Kultur Leioa, urriaren 16tik azaroaren 4ra), Basaurin (Ariz Dorretxea, azaroaren 6tik abenduaren 2ra) eta, amaitzeko, Getxon (Torrene Aretoa, abenduaren 5etik 30era) ikusi ahal izango da.

“Isilunearen poetikak, oihartzuna sortzen duten esentziak - Poéticas del silencio, esencias en resonancia”

Luis Miguel Gómez, Koldo Etxebarria  eta Jesús Lizaso sortzaileen azken proposamenak berrikuspen konparatibo bati lotuta konbinatzen dira baina, hori gorabehera, oso argi agertzen dira koherentzia programatikoko dohainak. Gure euskal geografiaren hiririk industrialenetako baten markoan eboluzionatu duten hiru autore dira, non-eta Basaurin. Sortzaileok, espazioari dagokionez,  elkarren ondokoak dira, hirurak hazi direlako bertan eta gaur egun udalerri horretan bizi direlako.

Halaber, egon dago belaunaldi mailako hurbilketa, eta horri esker aukera izan dute etenik eta arazorik gabe era azkarrean elkarren arteko komunikazio eta informazio uneak eta gure esparru kulturalaren bilakaera estetikoari buruzko eztabaidak eta berrikuspenak konpartitzeko,  eta euren proiekzio profesionalen transformazioen ezagun dira.

Asko dira hiru artistak elkarren artean erlazionatzen dituzten elementuak eta horrek erraztu egin du hala erakusketa abian jartzea nola  bere barruko koherentzia-egituratzailea lortzea. Baina, dena dela, egon dago berriz ere hirurak berriz multzokatzeko beste faktore bat. Isiluneak betetzen dituen esparruak sortzeko joera argia eta iraunkorra, eta joera hori nabarmena da bai Luis Miguel Gómezen eta Koldo Etxebarriaren  margolanetan eta baita, Jesús Lizaso eskultorearen kasuan, oihartzuna eragiten duten kofagune, bihurgune eta hutsuneen bidez babes-esparruetan gertatzen diren tolesturen fasearen formen adierazpenean ere. Azken finean, helburu erkideetan sakontzen duten jarrera metodologiko desberdinak: tolesturaren beharrizana, ikusmen-isiltasuna bilatzea baina, aldi berean,  opaku moduan definituko ez dena, eragin zuhurraren  muinetan gainezka egingo guena.

Ezarri diren gaien bidez konexionatuta irudiari lotuta dauden lanak hautatu dira,  bai Luis Miguel Gómezen oleoaren eraketatik, bai  Koldo Etxebarriaren 3D teknologietatik abiatuta; elkarrengandik urrun dauden teknikak, baina oinarri moduan buruko introspekzioa hartuta. Irudiaren sortzaile hauekin batera osagarri moduan agertzen dira Jesús Lizasoren ekarpen plastikoak; hauetan buru-hausnarketaren botere ez-materialak menperatu egiten du materia, eta praktika barneratu berri baten barruan sartzen gaitu.

Hasierako bi egileen hizkuntza figuratiboek, Jesús Lizasoren eskulturaren baldintzatzaile abstraktuekin batera, bide desberdinez egituratutako tapiza osatzen dute, baina ariketa metafisikoa sustatzerakoan helburu komun bat duena.

Luis Miguel Gómez (1955)

Basaurin bizi den artista autodidakta da; ibilbide sortzaile oso oparoa du eta erakusketa askotan parte hartu du. Erakusketa indibidualen eta talde-erakusketen artean  honako hauek azpimarra daitezke: azken urtean Burgoseko Casa del Cordón-en egin duena; Errioxako Parlamentukoa 2013an; Albaceteko Museo de Bellas Artes-ekoa 2014an, etab.  Bere obra erakunde eta espazio publiko eta pribatu askotan sakabanatuta dago, besteak beste  honako hauetan: Albaceteko Museoa, Ermuko udala, OSAKIDETZA–Bizkaia Bilduma, Galería Aitor Urdangarin Bilduma (Vitoria-Gasteiz), Elda-ko Museo del Calzado (Alacant), Zumarraga & Urretxu Bilduma (Gipuzkoa).

Luis Miguel Gómezen (Bizkaia, 1955) planteamenduak askotariko gaiekin osatzen den sortan oinarritzen dira, betiere  denbora estatiko eta espazio bakartu baten menpean errealismo magiko baterantz begiratzen duen alderdi batekin, eta horretatik figurak itxurazko irrealtasun halo baten murgiltzen dira. Beraz,   Dewey  eta Rorty-rengandik hurbil dagoen irudikapena, non eszena ideia eta patroi mentalen bidez definitzen den bidaia baten irudikatzen den.

Errealitatearen eta irrealtasunaren inguruan komunikaziorako erabiltzen dituen bideen ondorioz Xavier Zubiri pentsalariaren postulatuetara hurbiltzen da. Zubirik, gizakia definitu zuenean, esan zuen ez dela bakarrik “sentitzen duen adimena”, baizik eta, bereziki, errealitateen eta irrealtasunen  ekoizlea dela, gizakiak irrealtasuna sortzeko duen beharrizana errealitatean bertan egotearen adierazpena baino ez delako.

Koldo Etxebarria (1960)

Artista Basaurin bizi da. Arte Ederretan lizentziatu zen, 1983an, Euskal Herriko Unibertsitatean eta urte horretan bertan hasita eta egunera arte   EITBren Departamentu Artistikoan egiten du lan eta horregatik  derrigorrez prestakuntza teoriko eta praktikoa izan ditu telebista euskarrian lengoaia bisualean aplikatzeko programa informatikoetan.

Nazioarte mailako erakusketa garrantzitsuak burutu ditu: Lacda-Digital Art Galery: “Snap to Grid“ (Los Angeles) 2008an eta Federation of Canadian Artists (Vancouver, Kanada) 2015ean. Beste alde batetik, nazioarte mailako sari garrantzitsuak irabazi ditu, besteak beste “Digital Imagery Exhibition” - Federation of Canadian Artists (Vancouver) eta Fundación Focus-Abengoa Saria (Sevilla), biak 2015. urtean.

Koldo Etxebarriaren (Bizkaia, 1960) proposamenek aurreko beste erreferente batzuetara jotzen dute, hala   pintura metafisiko italiarrekoak  nola Edward Hopper  eta Charles Sheeler-en proposamen batzuetakoak, ez egotearen poetika baten haria izango litzatekeenean; baina, aldi berean, Gregory Crewdson-en argazkilaritza-ekarpenean egiaztatzen dena, eta baita    Lee Friedlander, Robert Frank, Joel Meyerowitz  edo Stephen Shore-ren eszena zinematografiko jakin batzuen irudian ere. 

Sortzaile honen pinturaren markoa 3D teknologien bidez espazio metafisikoen bilaketa moduan definitzen da Jean Klein-en testu advaita ezagunekin eta, aldi berean,  D.T. Suzuki  eta Erich Fromm-en pentsamenduarekin lotuta. Horregatik bere eszenetan nagusitzen den isiltasunak adierazgarritasun metafisiko handiko unibertsoa biltzen du.

Jesús Lizaso (1961)

Lizaso Basaurin bizi da eta bertan egiten du lan. Prestakuntzari dagokionez autodidakta da baina etenik gabe jardun du marko artistikoari egokitzeak eragindako beharrizanetan eta, ondorioz, teknika plastiko asko ikasi ditu era askotako zentroetan eta espazioetan. Erakusketei dagokienez, hala indibidualak nola taldekoak, etenik gabekoak dira eta asko ditu; honako hauek azpimarra daitezke:   Rekalde Aretoa (2015, Bilbo), Durangoko Arte  eta Historia Museoa (2014) eta Torrer Tower Espazioa (2004, Chicago). Halaber, nazioarteko aipamenak eta sariak irabazi ditu eta horien artean Eskulturaren arloko  Lorenzo il Magnífico Urrezko Domina, 8ª Florence Biennale Internazionale dell’Arte Contemporanea (Italia)  aipatu behar da,  2011n.

Jesús Lizaso (1961) eskultoreak tolesturen edo atzera-egiteen artikulazioa Ortotropías seriearen barruan sartuko litzateke, baina presentzia metaforiko baten moduan onartuta, Gilles Deleuze-ren hitzetan arimaren askatasuna bilatzen duen labirinto baten ideiaren ildotik joko lukeena, hau da, era sinbolikoan arimaren presentzia azpimarratzeko tolesturak.

Bere proposamenetan sistema intelektual baten eraikuntza antolatzen da, aldi berean solidoen eta horien gogortasun-eskalaren, hau da, Mosh-en eskala ezagunaren, teorian sartzen doana. Baina ikus daitezkeen hautemateen simulazio bat eta antzezpen bat baino ez da. Ildo horretatik, ematen du artistak sendotasun materiala sortzen duten atomoen euren kohesio-indarrak hausten dituela, bere proposamenek puskatu egiten dutelako kontingentzia fisiko hori.

Espresionistagoak izan diren bere aurreko lanekin eta proposamen publikoen proiekzioarekin  alderatuta Ortotropías buruko jarrerako ariketa moduan azaltzen da, barneratua eta   introspektiboa.

Zelaietako ikastaroetako lanen erakusketa

2018/09/19
Ikastaroetan egindako lanak ikusgai Zelaietako 1.pisuan irailaren 17tik 30era: bitxigintza, eskulanak, puntua, joskintza…

Gogoratu ikastaroetan izena emateko epea oraindik zabalik dagoela, irailaren 25era arte. Ikusi zer egin dezakezun eta animatu zaitez!!

Euskaraz egingo diren ibilaldi gidatuak antolatu ditu Ametx erakunde autonomoak

2018/09/25
• Oraingoan hurbileko ingurutik apur bat urrundurik gauzatuko ditugu ibilaldiak. Urruntze horretarako, Amorebieta-Etxanoren ezkerraldera eta eskuinaldera begira jarri gara, eta mendebaldetik ekialdera eragingo gaitu udazkeneko haize epelak, 12-15 kilometro inguruko ibilaldiak eginez. • Ibilaldiak urriaren 20an eta 27an, eta azaroaren 10ean eta 17an izango dira, goizeko 8:00etan hasita. • Autobus zerbitzua izango da etapak hasten eta amaitzen diren lekuetarako, eta Nafarroako parkina izango da batzeko tokia. • Informazio gehiago nahi izanez gero, www.ametx.eus web orrian begira daiteke. Zelaieta zentroan eman beharko da izena, irteerak baino bi egun arinago beranduen jota. Leku kopurua mugatua da.

Hamabi eta hamabost kilometro bitarteko lau ibilaldik osaturiko ekimena antolatu du Amorebieta-Etxanoko Udalaren mendekoa den Ametx erakunde autonomoak, Ibiliaz Ezagutu programaren barruan. Oraingoan hurbileko ingurutik apur bat urrundurik gauzatuko ditugu ibilaldiak. Urruntze horretarako, Amorebieta-Etxanoren ezkerraldera eta eskuinaldera begira jarri gara, eta mendebaldetik ekialdera eragingo gaitu udazkeneko haize epelak.

Ibilaldiak urriaren 20an eta 27an, eta azaroaren 10ean eta 17an izango dira, goizeko 8:00etan hasita. Etapa guztiei emango zaie hasiera Nafarroako parkinean eta autobus zerbitzua izango da bertatik ibilaldien hasiera puntura iristeko eta behin amaituta ere, Amorebietara itzultzeko. Honakoak izango dira, zehazturik, lau larunbat horietan egingo diren ibilaldiak:

Urriaren 20an, Enkarterriak 1: Ibilbide honetaz baliaturik, Enkarterrietako parajeetako bat ezagutuko dugu. Karrantzaren edertasunak liluraturik utziko gaitu, eta Armañonen inguru ederra bezain latza ezagutuko dugu.

 

Urriaren 27an, Enkarterriak 2: Ibilbide honek ez gaitu batere epel utziko. Txunditzeko dugun gaitasunak goia joko du oraingoan, berde biziko tontor leunak eta harrizko mendi puntak tartekatu egingo baitira gure begien aurrean.

Azaroaren 10ean, Aulestia- Markina: Lea-Artibaiko haran sakon eta estuetan barrena ibiliko gara irtenaldi honetan. Mendiz inguratutako zulotik abiatuta, eguzki izpien epeltasunarekin bat egiteko asmoaz goranzko bidea hartuko dugu, gailurreko ikuspegiez gozatzeko.

Azaroaren 17an, Araotz (Oñati): Bizkaia lurralde historikotik gehiegi urrutiratu gabe, neba-arreba ditugun gipuzkoarren lurraldea bisitatuko dugu. Zeruko laino artean galtzen diren tontorrak alde batera utziz, apaltasunez bezain besteko edertasunez jantzitako mendi, paseo eta ibilbideez gozatuko gara.

Informazio gehiago nahi izanez gero, www.ametx.eus web orrian begira daiteke. Zelaieta zentroan eman beharko da izena, irteerak baino bi egun arinago beranduen jota. Leku kopurua mugatua da.

Jarduera fisikoaren onura, orohar, berekin dakarren arriskua baino handiagoa da. Nolanahi ere, ariketa fisikoa egiten duen orok jakin beharra dauka jarduera horiek eguneroko bizimoduan arriskurik gabe txertatzen, eta segurtasuna bermatzeko neurriak hartzen.

'Wenses y Lala' antzezlanarekin hasiera emango zaio Zornotza Aretoko denboraldiari

2018/10/03
• Ikuskizuna ostiral honetan ikusi ahal izango da, urriak 5, 20:15ean • Programazio berriak dantza, antzerkia, musika eta zinea biltzen ditu, gustu guztietarako eskaintza eta jende guztiarentzat

Amorebieta-Etxano, 2018ko urriaren 3a. Amorebieta-Etxanoko Zornotza Aretoak herriko kultur guneko denboraldi berrirako programazioa aurkeztu du. Gustu eta publiko guztientzako proposamenak jasotzen ditu: dantza, antzerkia, musika, zinea eta familientzat eta umeentzat prestatutako ikuskizunak.

Denboraldiari hasiera emateko lehenengo ikuskizuna Wenses y Lala izango da. Elena Olivieriren antzezlan honek baserritar biren istorioa kontatzen du. Hilik daude baina bizitzeko aukera eduki izana ospatzen dute. Hitzordua ostiral honetan izango da, urriaren 5ean, 20:15ean.

Datozen hilabeteetan, Zornotza Aretoan KINE zineklubak antolatutako zortzi zine ziklo ikusi ahal izango dira.

Barreterapia, Arrakalak, Egundoko emakumeak, Ongi Etorri Errefuxiatuak, Fmeninoan, Zornotza label eta film laburren maratoiaren IV. edizioa. Gainera, zineklubak hiru zine jardunaldi antolatu ditu mendiari buruz Andrés Espinosa Gogoratuz.Mendi Astea izenarekin.

Zornotza Aretoko programazioa hainbat dantza, antzerki, musika eta zine ikuskizunek osatzen dute. Programa honetan daude denak bilduta:
https://www.ametx.eus/eu/zerbitzuak/aretoa

Luna Dangelis youtuberra eta Zwei Japoniako emakumeen rock taldea izango dira eskaintza gastronomiko zabala izango duen Mangamoreko edizio honetako gonbidatu nagusiak

2018/10/08
• Japoniako kultura eta manganimearen jaialdia urriaren 12tik 14ra izango da Amorebieta-Etxanon • Programan kontzertu bi nabarmendu beharra dago: Behotsik Bilbao Orkestrarena eta Onigiri Cosplay Ani-Son Stage talde japoniarrarena. • Gune gastronomiko berri bat egongo da aurten Zubiondo plazan; hainbat food truck egongo dira

Amorebieta-Etxano, 2018ko urriaren 8a. Japoniako kultura eta manga gogoko dutenak berriro ere Amorebieta-Etxanon bilduko dira urriaren 12 eta 14 artean. Mangamoreko jaialdiaren hamabigarren edizio honetan tailerrak, musika emanaldiak, lehiaketak, bideo-jolasak, umeentzat ekintzak, etab. egongo dira.

Hainbat ekitaldi nabarmendu badaitezke ere, Luna Dangelis youtuberra aipatu behar da zalantzarik gabe. Milioi eta erdi jarraitzaile baino gehiago ditu Japoniako pop kulturako gaiak lantzen dituen youtuber honek. Deiak youtuberrarekin batera (800.000 jarraitzaile), igandean 13:00etan Amorebieta IV pilotalekuan egingo duen fan meetingean entzun ahal izango zaio. Leku berean, larunbatean, 12:30ean, Garuna Effect ikuskizun zientifikoa ikusi ahal izango da. Animeko telesailetako asmakizun eta botereei buruz hitz egingo da, umore askorekin eta modu didaktikoan.

Musikak garrantzi handia du Mangamoren. Horrela, jaialdiaren lehenengo egunean Behotsik Bilbao Orkestraren kontzertua egongo da. Japoniako bideo-jolasetako abestien bertsioak entzun ahal izango dira pilotalekuan. Beste kontzertu batzuk ere egongo dira, esaterako Zwei rock talde japoniarra, Japonen hainbat animeren soinu banden egileak edo Onigiri Cosplay Ani-Son Stage.

 

Aisialdi elektronikoari dagokionez, aurten ere, Mangamorera datozenek 80 eta 90. hamarkadako jokoez gozatu ahal izango dute jolas-areto retro batean. Han egongo dira Pac-man edo Donkie Kong esaterako. Bertan gurasoak beraien seme-alabekin jolastu ahal izango dira gaztaroan egiten zuten bezala.

Maila honetako ekitaldi batean ezin falta jolasak. Pokemon egongo da larunbatean eta aurten Clash Royale edo Fornite torneoak nobedadea izango dira. Cosplay, karaoke, dantza eta Shogi bezalako jolas tradizionalen lehiaketak ere egongo dira.

Umeak egurrezko jolasekin jolastu ahal izango dira nagusi batekin, horretarako prestatutako ludoteka batean. Photocall bat ere egongo da Ureshirekin, jaialdiko maskotarekin. Honek urtez urte arrakasta handiagoa du gazteen artean. Zelaietan puzgarriekin gune bat ere egongo da umeentzat eta merchandising produktuekin hainbat postu.

Aurten hitzaldi bat egongo da bideo-jolasen munduan emakumeek duten presentziari buruz. Gamerrak eta sektore honetan Estudio Crevice bezalako enpresak sortu dituzten ekintzaile emakumeak egongo dira bertan. Bideo-jolasen tailerrak ere egongo dira, hastapena, ·3Dan pertsonaiak diseinatzeko eta nazioarte mailan ezagunak diren cosplayerren hitzaldiak, adibidez Taifu edo PopiJack eta N-Cast euskal youtuberra. Azken honek Dragon Balli buruz hitz egingo digu.

Umore horiko gune bat egongo da, Japoniako programa ezagunetan egiten diren antzeko probekin, jendeak zein parte-hartzaileek gozatu dezaten. Zubiondo plazako gune berrian egongo da, Ekialdeko janaria eskainiko duten food trucken alboan. Hemen larunbatean zein igandean sushia probatu ahal izango da 18:00etan.

Zubiondoko gune berrian formatu txikiko emanaldiak egongo dira: DJ Socia Japoniako discjokeyak jarriko duen musika elektronikoa edo Igor Cerainen piano kontzertua.

Larunbatean tren bat ibiliko da herrian zehar eta Larreako futbol zelaian egingo den Quidditch lehiaketara hurbilduko du jendea egun guztian. Tanabe klubaren eskutik aikidoa bezalako kirolak ere ikusi ahal izango dira Mangamoren.

Crunchy Rollen eskutik hainbat proiekzio ikusi ahal izango dira Zornotza Aretoan larunbat eta igande goizean.

Informazio guztia ondoko web orrian dago: www.mangamore.net  

Mangamore jaialdiak milaka bisita izan ditu asteburuan, eta bisitariek programatutako 100 jarduera baino gehiagotan parte hartu ahal izan dute

2018/10/17
• Hauexek izan dira parte-hartzaile gehien izan dituzten ekintzak: Behotsik orkestraren ostiraleko kontzerta, larunbateko Cosplay txapelketa eta Zwei taldearen kontzertua, eta igandeko Dance lehiaketa • Luna Dangelis eta Deiak-ekin egindako topaketetan mila pertsona baino gehiago bildu ziren larunbatean zein igandean • Hitzaldi eta aurkezpenetan, halaber, aurreko urteetan baino jende gehiagok hartu du parte, batik bat, Noh antzerkian eta Jasone Irastorzak emakumeei eta bideojokoei buruz eskainitako hitzaldian

Amorebieta-Etxanon, 2018ko urriaren 16an. Mangamore jaialdiaren hamabigarren edizioak, aurten ere, arrakasta handia izan du, eta 14.000 pertsona baino gehiago izan dira bertan jaialdia antolatu den hiru egunetan. Amorebieta-Etxano anime eta Japoniako kulturarekin zerikusia duten 100 jarduera baino gehiagoren agertokia izan da. Parte-hartzaile batzuk beste probintzia batzuetatik etorri direla nabarmendu behar da, Pilareko zubia izan da eta. Igande goizean, nahiz eta eguraldiak lagundu ez, 1.200 pertsona bildu ziren Luna Dangelis eta Deiak youtuber-ren topaketan eta sinaduren txokoan. Arratsaldean, bestalde, ia 1.400 pertsona egon ziren Dance lehiaketa ikusten.

Ostiralean eta larunbatean etorri da jende gehien, eta milaka pertsona bildu dira askotariko jarduerak egiteko; besteak beste honako hauek izan ditugu: tailerrak, musika-emanaldiak, txapelketak, bideojokoak eta haurrentzako jarduerak. Ekimenen artean ikuskizunek izan dute arrakasta gehien, Behotsik orkestraren kontzertuak, Taiko Issho Daiko taldearen kontzertuak eta Cosplay lehiaketak esaterako, bai eta Japoniako nesken Zwei izeneko rock taldeak ere.

Era berean, pertsona ugari bildu ziren, bai bideojokoen lehiaketetan, bai Cristina Sombray sukaldariak larunbatean eskainitako sushi dastatzean. Oro har, gastronomia-gune berriari balorazio oso ona eman zioten bertara joan zirenek.

Irakurketa Kluba EUSKERAZ

2018/10/18
Hilean behin, aurretik irakurritako liburu bati buruzko komentarioak. Asteazkenetan.

Dinamizatzailea: Ainhoa Aldazabal.

 

 2018. Abenduaren 12an

 

Ordua: 16.30/18.00

Amorebieta-Etxanoko Udalak hiru tailer antolatu ditu emakumeen ahalduntzea bultzatzeko

2018/10/29
• Musika kritikoko laborategiak gaur egun gazteek entzuten duten musikan dagoen matxismoaren gainean gogoeta egin nahi du. • Autodefentsa tailer bi egongo dira gazteentzat zein helduentzat. Tailer hauetan eraso matxista baten aurrean erabiltzeko tresnak eskainiko dira.

Amorebieta-Etxano, 2018ko urriaren 29a. Amorebieta-Etxanoko Udalak azaroaren zehar hiru tailer martxan jarriko ditu, emakumeen ahalduntzea bultzatzeko.

Horrela, lehenengoa Musika Kritikako Laborategi bat izango da. Berdintasun Sailaren eta Ametxen artean antolatu da eta gazteei zuzenduta dago. Musika gizakion eguneroko bizimoduaren parte da, are gehiago gazteei dagokienean eta abestiek jaurtitzen dituzten mezuek, neurri handi batean eragina dute sentimenduetan, portaeran… Tailer honen helburua gogoeta egitea da eta gazteek entzuten duten musikarentzat aukerak proposatu, azken batean, entzuten dugunaz ohartu eta musikaren mezuak aztertu eta baita musika matxista existitzen denaren ustea desmitifikatu eta musikan matxismoa dagoela jabetu.

Zer: Musika kritikako laborategia
Non: Gazte txokoan
Noiz: Azaroaren 17an, 10:00-14:00
Izena-ematea: Azaroaren 15era arte

Bigarren tailerra, Ametxekin batera antolatu dena hau ere, neska gazteentzako autodefentsa feministaren ingurukoa izango da, hau da, eraso matxisten prebentziorako modurik onena bilatzeko tailerra. Zentzu honetan, ikastaro honek gazteei tresnak ematen dizkie beraien garapen pertsonalerako eta beraien buruarengan konfiantza lantzeko eta baita indarkeria matxistaren egoeren aurrean babesteko teknikak izateko.

Zer: Autodefentsa feminista neska gazteentzat
Non: Gazte txokoan
Noiz: Azaroaren 10ean, 10:00-14:00
Izena-ematea: azaroaren 8ra arte

Udaleko Berdintasun Sailak antolatutako hirugarren ikastaroa, emakume helduei zuzendutako autodefentsa feminista tailer bat da. Emakume bakoitzaren konfiantza garatu nahi du, biktima papera baztertu eta egoera arriskutsuei aurre egiteko gai izateko lan egin, horretarako teknikak ikasiz.

Zer: Autodefentsa feminista helduentzat
Non: Zelaieta Zentroa
Noiz: Azaroaren 24a, 10:00-14:00 / 16:00-20:00
Izena-ematea: azaroaren 12ra arte

Interesa dutenek gaurtik, astelehena, aurrera izena eman dezakete. Horretarako 946300190 telefono zenbakira dei dezakete edo mezu bat bidali helbidera.

Irekita dago Larrea kiroldegiko 2019ko urtarriletik martxora bitarteko ikastaroetan izena emateko epea

2018/11/12
Erabiltzaileek ez dute zertan Larreara joan aurretiko izen-ematea egiteko, eta etxetik gauza dezakete, Internet erabilita.

Azaroaren 12tik 30era bitartekoa izango da inskripzio epea, eta abenduaren 10ean zozketatuko dira ikastarootan dauden lekuak, eguerdiko 12:00etan. Zozketa egin eta gero, 14an argitaratuko dira Larrea kiroldegiko oholean lekua duten pertsonen zerrendak, eta abenduaren 19ra arte, gauzatu ahalko dute interesdunek ordainketa. Ikastaroan lekua izan eta, epe horretan matrikula ordaintzen ez dutenen eskariak bertan behera utzitzat hartuko dira.

Interesa duten pertsonek on-line bete ahalko dute, aurretiko-izen-ematea interesa duten  diziplinan edo, bestela, Larrea kiroldegira joanda.

Abenduaren 26an argitaratuko dira Larrea kiroldegiko iragarki oholean leku hutsak okupatzeko eskubidea duten eskatzaileen izenak (abenduaren 10eko zozketaren ondoriozko ordenaren arabera), eta interesdunek bertan kontsultatuko dute lekua duten ala ez.

 Pertsona horiek, ikastaroa egin nahi izanez gero, abenduaren 26a eta 27a izango dute ordainketa egiteko.

Behin epe hori igarota, eskubide guztiak galduko dituzte, eta leku hutsik geratuz gero, abenduaren 28tik aurrera Larrea kiroldegiaren sarrerara etorri eta ordainketa gauzatzen dutenei esleituko zaizkie, agerpen ordenari zorrozki jarraituaz.

UMEEN IGERIKETA IKASTAROAK

Igeriketa ikastaroan lekua lortu ez eta itxaron-zerrendan geratzen diren umeek bermatuta izango dute lekua ezaugarri berberak dituen hurrengo ikastaroan, beti ere zerrendaren ordenari jarraiki, ikastaroaren lekuak bete arte.

Gogorarazten da, halaber, Ametx erakunde autonomoak ezarrita duela eskaintza osatzen duten ikastaroak antolatuko badira, ezinbestekoa dela matrikula egiten dutenen pertsona kopurua guztirako lekuen gehi bat izatea gutxienez.

 

Amorebieta-Etxanoko II. ENPRESA IDEIEN LEHIAKETAko sariak banatu dira Durangon

2018/11/27

Bizkaiko Foru Aldundiak bultzatutako eta Durangaldeko Udalen partehartzearekin garatutako Gaztedi Durangaldea proiektuaren barruan Amorebieta-Etxanoko II. Enpresa Ideien Lehiaketa antolatu da 2018 urtean.

Sari banaketa azaroren 26an izan da Durangoko Elkartegian “I´m bizi” enplegu ekitaldearen barruan.

Lehiaketaren II. Edizio honetara Amorebieta-Etxanon bost proiektu aurkeztu dira: Errementalde, Gestifultbol, Supri, Ventanas fotovoltaicas eta Amorebieta Martxan. Gaztedi Durangaldeko hiru zonalde bakoitzean deialdi bat egin da eta guztira 32 proiektu aurkeztu izan dira: 5 Amorebietan, 22 Durangon eta 5 Ermuan.

Bizkaiko Foru Aldundiak GAZTEDI BIZKAIA 2020 proiektua bultzatu zuen eta Durangaldeko Udalek bat egin zuten GAZTEDI DURANGALDEA abiaraziz. Bertan barneratutako ekintzen artean, 16-29 urte bitarteko gazteei zuzendutako enpresa ideien lehiaketa antolatu zen. Aurten jasotako proiektuak baloratu ondoren, irabazleei merezitako saria emateko txanda izan da.

Hauek izan dira zornotzako aurtengo saridunak:
Lehenengo Saria. 1.000€. “Ventanas fotovoltaicas” Sergio Marquez Gascón, Xabier García Martínez eta Adrian Nieto Fernández
Bigarren sariak. 500€.

  • “Gestifutbol” Gorka Silva Bóveda, Josu Isasi Razkin eta Ibon Goitia Bollar
  • “Amorebieta Martxan” Unai Zubero Alvarez de Eulate, Olatz Ayesta Mendia eta Ane Romero Cubillo
  • “SUPRI” Jesús Castro Gallego, Jennifer Corbacho eta Noelia Castro Gallego
  • “Errementalde” Irenka Agirre Heras, Eder Puente de la Cal eta Edorta Agirre Heras


Jatorrizko tamainako irudia: 4.99 MB | Irudia ikusi Ikusi Irudia deskargatu Deskargatu

Kirol zerbitzuetako abonuetan aldaketak egiteko epea irekita

2018/12/17
Abonodunak diren erabiltzaileek 2019ko urtarrilaren 4a baino lehen eskatu ahalko dituzte aldaketak.

Ametx erakunde autonomoak 2019ko urtarrilean gauzatuko ditu udalaren kirol instalazioak erabiltzeko urteko abonua helbideratuta daukaten erabiltzaileen kuoten kobrantzak.

Abonodunak diren erabiltzaileek ordaintzeko moduari, helbideratzeari, kontu zenbakiari… dagozkien aldaketak egin edo baja eman nahi izanez gero, 2019ko urtarrilaren 4ra arteko epea edukiko dute aldaketa horiek eskatzeko. Horretarako, zuzenean joan ahal dira Kiroldegiko edo Zelaieta Zentroko Erregistrora, edo posta elektronikoz egin dezakeete, kirolak@ametx.eus helbidera e-maila bidalita.


Jatorrizko tamainako irudia: 64 KB | Irudia ikusi Ikusi Irudia deskargatu Deskargatu

Ikasgelaren ordutegia GABONETAn

2018/12/13

IKASGELA - GABONAK

Gabonak heldu dira Amorebieta-Etxanora ekintza programa zabal batekin

2018/12/13
• Gabonetako kontzertua, Olentzeroren bisita edota Errege Magoen Kabalgata Gabon hauetako programaren barruan daude. • Abenduaren 26tik 30era Zelaieta Zentroan “Gabonetan Jai” umeentzako programa antolatu da. • Abenduaren 31n zornotzarrek urteari agur esateko aukera izango dute San Silvestre lasterketarekin.

Amorebieta-Etxano, 2018ko abenduaren 12a. Amorebieta-Etxanok Gabon itxura hartu du. Gabonetako argiak gaur arratsaldean piztu dira eta horrekin hasiera eman zaio ume eta nagusientzat urtarrilaren 11ra arte prestatu den kultur eta aisialdi programazioari.

Musika, antzerkia eta kirola
Larunbat honetan, abenduaren 15ean, 16:00etan, Larreako elizan Gabon kanten errezitaldi bat egongo da. Abenduaren 16an, 20:00etan, Zelaieta Zentroan “Not in my town” film laburren sari banaketa egongo da. 11 urtetik gorako gaztetxoei zuzenduta dago eta helburua gaztetatik diskriminazioari aurre egitea da. Lehiaketan lau sari banatuko dira. Bi epaimahaiak emango ditu eta bi publikoak eta egunean bertan emango dira.
Urtero bezala, Zubiaur Musika Eskolak Gabonetako kontzertua eskainiko du. Abenduaren 21ean izango da 20:15ean Zornotza Aretoan. Aurten ere, Zubiaur Musika Eskolako irakasle eta ikasleek ordubetez musika korala eta instrumentalaz gozatzeko gonbita egingo digute giro atsegin, alai eta parte-hartzaile batean. Aurreko edizioetan bezala, estilo ezberdinetako obra eta abestiak entzun ahal izango dira, talde ezberdinen eskutik. Horrek, bakoitzari bere ukitua emango dio.

Abenduaren 23an Amorebieta-Etxanoko kaleetan Gabon-kantak entzun ahal izango dira herriko koru eta txistularien eskutik. 12:30ean hasiko dira kalerik kale eta 13:45ean Kalbario plazan amaituko dute, koru guztiek batera “Mesias Sarritan” abestuko dutelarik.

Abenduaren 26an, Zornotza Aretoan, Zinegabonak programaren barruan, stop motion tailer bat egingo da 12:00etatik 14:00etara.
Abenduaren 28an Zornotza Aretoa bere 25. urteurrena ospatzen hasiko da “Los últimos visitantes” izeneko talk show batekin, arratsaldeko zortziak eta laurdenetan (20:15). “Antitertulia” bat da, gogoeta egiteko eta dibertitzeko zuzeneko musikarekin eta Zornotza Aretoan bere arrastoa utzi duten sei pertsonaiarekin. Aretoaren hogeita bosgarren urteurreneko ospakizunek urtarrilaren 7an eta 11n jarraituko dute, Markeliñeren “Julietas Romeo circo” antzeztuko delarik. Euskal zirku garaikideko ikuskizuna, dibertigarria, tragediaren emozioari uko egiten ez diona.

Zornotza Aretoan “Albert” pelikula ikusi ahal izango da abenduaren 29an 12:00etan. Egun bat beranduago Zubiondo plazan AIDAEren klasikoen rallya egongo da.

Urtarrilaren 2an Gontzal Mendibil eta Easo Txiki Abesbatza, Txan magoaren laguntzarekin, Zornotza Aretoko taula gainera igongo dira 20:00etan hasiko den musika-gau magiko bat bizitzeko.

Gabonetan Jai
Abenduaren 26tik 30era goizez zein arratsaldez Zelaieta Zentroko pilotalekuan “Gabonetan Jai” umeentzako programa antolatu da. Tailerrak, puzgarriak, musika, emanaldiak…, denetik egongo da umeek Gabonetako oporrak gozatu ditzaten.
Sarrerak 3 euro balioko du eguneko eta 10 euro bost egunetarako bonu bat eskuratuz gero.

Gauero Gabonetan
Abenduaren 26tik 30era 10 urte baino gehiago dituzten zornotzar gazteek beraientzat prestatutako hainbat jardueratan parte hartu ahal izango dute. Esate baterako, mahai-jolasak, bideo-jokoak, errealitate birtuala, futbolina edota bestelakoak. Guzti hori 17:00etatik 21:30era egongo da Zelaieta Zentroan.

Gabonak Olgetan
Etxeko txikienek jolas gune bat izango dute 11:30etik 13:30era eta 17:00etatik 20:00etara. Jarduera ludikoak egongo dira 0-3 urte arteko umeentzat.

Olentzero
Abenduaren 24 guztietan bezala, Olentzero menditik jaitsiko da zornotzar guztiei agur egitera, gau osoko lanari ekin aurretik. 18:00etan neska-mutikoak Herriko plazara joan daitezke Olentzerori Gabonetarako zer eskatu duten esateko. Era berean, Olentzeroren etorrerari aurrea hartzeko, hala nahi duten zornotzarrek Belatxikietako igoera tradizionalera joateko aukera izango dute, 9:30etik aurrera.

Gabon zaharrak
Zornotzarrek urteari agur esateko aukera izango dute San Silvestre lasterketarekin. Hau abenduaren 31n izango da eta 16:30ean Zelaietatik hasiko da.

Erregeen kabalgata
Urtero bezala, urtarrilaren 5ean, Amorebieta-Etxanoko neskato-mutikoek Ekialdeko Errege Magoei ongi-etorria emango diete ohiko kabalgatarekin. Argi eta kolorez beteriko ikuskizuna izango da eta herritar guztiei parte hartzeko gonbita egiten zaie. Ibilbidea Gudari kalean hasiko da 18:00etan eta Herriko plazan amaituko da. Han nahi duten umeek Errege Magoekin egoteko aukera izango dute.

Zornotza Aretoak 25 urte egingo ditu erreferente kultural gisa

2018/12/17
“Los últimos visitantes” ikuskizuna eskainiko da Aretoan. Aretoaren 25 urte hauetan arrasto berezia utzi duten sei pertsonaiarekin antitertulia bat “Julietas Romeo Circo” ikuskizuna estreinatuko da urtarrilaren 7an. Zirko garaikideko ikuskizun bat da, euskal zirkuaren aldeko apustua egiten duena.

Amorebieta-Etxanoko Zornotza Aretoak 25 urte betetzen ditu. Urte hauetan arte eszenikoetan, dantzan eta musikan erreferente bihurtu den zentro kulturala da.

Urtemuga ospatzeko, zentroak hainbat ekintza antolatu ditu herriko publiko guztientzat. Ekintzak abenduaren 28an hasiko dira. Egun horretan “Los últimos visitantes” ikusi ahal izango da. Zornotza Aretoko historiaren zati bat memoriara ekartzeko sortua izan da.  Aretoaren 25 urte hauetan arrasto berezia utzi duten sei pertsonaiarekin antitertulia bat egingo da dibertsiorako. Kulturaren arlo eta geografia desberdinetako sei artista ezagun bilduko dira teilatu lau batean jan eta edateko. Arrate Etxebarria izango dute gidari.

Baina nortzuk dira ikuskizun honetan parte hartuko duten gonbidatuak? Tadeusz Volsky, O Gran Criador, Txarribodaren nobixe, Zhivagoren amorantea eta El pianista en el océano dira. Aretoak lehiaketa bat planteatzen du zornotzar guztientzat.

Ezizenak irakurri eta nor diren dakitenek, formulario hau bete ahal izango dute eta hiru pertsonaia gutxienez asmatzen dituztenen artean, Aretorako doako kuotak zozketatuko dira.

Urtemugaren egun berean, urtarrilaren 7an, Zornotza Aretoan Markeliñe konpainiaren “Julietas Romeo Circo” ikuskizuna estreinatuko da. Azken honek ere urteak betetzen ditu (35 urte egingo ditu Markeliñek). Zirku garaikideko ikuskizun bat izango da, euskal zirkuaren aldeko apustu handia agerian uzten duena. Obra dibertigarri bat, tragediaren emozioari uko egiten ez diona. Ikuskizun piztu, sutsu eta fisikoa, lurralde formal berrietan barrena doana, istorio unibertsal eta ezagun hori kontatu nahi duena, testurik gabe. Markeliñeren ikuskizuna berriro ikusi ahal izango da urtarrilaren 11n, 20:15ean.

Zornotza label zikloa

Zornotza Aretoko urtemugaren barruan, martxoko astearteetan “Zornotza LABEL” zikloa ikusgai egongo da. Zinearekin lotura duten Amorebieta-Etxanoko herritarren film eta film laburrak egongo dira, ondokoenak esaterako: Lara Izagirre, Arkaitz Basterra, Rafa Escolar eta Gaizka  Brougeaud.  

Bazkideen kanpaina

2019ak beste aldaketa bat dakar berarekin. Bazkideentzat doakoak diren ikuskizunak ez dira adieraziko. Lehenengo aldiz, beraiek izango dira urteko doako 2 ikuskizunak aukeratuko dituztenak, inongo mugarik gabe.  Kuota helbideratuta dutenei, txartela zuzenean aktibatuko zaie urtarrilaren 2an, Gontzal Mendibil eta Easo Txiki abesbatzaren Gabonetako musikalarekin batera. Zornotza Aretoko bazkide izan nahi dutenek, Zelaietara joan beharko dute Ametxeko txartelean aktibatzeko edo txartel bat eskatu beharko dute. Ordaindu beharreko zenbatekoak hauek dira: 30 € urteko kuota normalerako, 15 € 14-29 urte artekoek eta 65 urte baino gehiago dituztenek eta 10 € 14 urtetik beherakoek.

Kuota ordainduta, doako ikuskizun bi izatez gain, %25eko deskontua lortzen da gainontzeko zuzenekoetan eta Sareako gainontzeko antzokietan. Txartela leihatilan aurkeztuz gero larunbat, astelehen eta zine klubeko astearteetan, zinerako 3 sarrera doan ere eskuratu daitezke.

URTE BATEKO BAZKIDE KUOTA DOAN LORTZEKO PARTE HARTU GURE LEHIAKETAN

Kontu-Leku 2019

2018/12/27
Literatur Tailerra Haur eta familientzat. Dinamizatzailea: Aitor Ormaetxea. Ipuinak, kontuak, altzo-jolasak, musika, ......

9 ostiraletan. Hasiera: Urtarrilaren 25ean / Amaiera: martxoaren 29an

Bi talde adinaren arabera: 3/4 urtekoak (17.30) eta 5/6/7koak (18.30)

Haurra heldu batekin etorriko da.

Kopuru mugatua: 8 haur+ heldu

Izena emateko epea: urtarrilaren 2tik 16ra arte.

 

Amorebieta-Etxanon egingo da Zornotza Nazioarteko Krosaren 65. edizioa

2019/01/03
• Hitzordua igande honetan, urtarrilaren 6an, izango da, eta nazio mailako atleta hoberenek eta nazioarteko goi mailakoek hartuko dute parte. • Kros honen historian zehar, atletismoaren zenbait espezialitatetan Joko Olinpikoetako edo Munduko txapeldun absolutuak izan diren 50 atleta inguru igaro dira Jauregibarriako zelaietatik.

Amorebieta-Etxanon, 2019ko urtarrilaren 3an. Atletismo hoberenaz beteko dira Amorebieta-Etxanoko Jauregibarriako zelaiak domeka honetan, urtarrilaren 6an, Nazioarteko Zornotza Krosaren 65. edizioa egingo baita.

Iaz 800 atletak parte hartu zuten jardunaldi honek, 10 proba izango ditu ondoko kategorietarako: kimu, ume-kategoria, kadete, gazte kategoria, junior eta absolutua.  Horien ondoren, bigarren urtez jarraian, 2 kilometroko lasterketa paralinpikoa izango dugu. Geroago 4,7 kilometroko herri lasterketa egingo da, gura duten guztiek parte hartzeko zabalik egongo dena, eta ez da beharrezkoa izango lizentziarik izatea. Nazioarteko proba absolutuei dagokienez, 12:30ean emakumeena hasiko da, eta 13:15ean gizonena. 8,7 kilometroko eta 10,7 kilometroko ibilbidea izango dute, hurrenez hurren.

Mundu osoko hoberenetakoa den Zornotzako belar gaineko zirkuitutik, nazio eta nazioarte mailako atleta hoberenak igaro dira historian zehar. Guztira, atletismoaren zenbait espezialitatetan Joko Olinpikoetako edo Munduko txapeldun absolutuak izan diren ia berrogeita hamar atleta.  

Aurten proba European Athleticsen (Atletismoko Europako Federazioa) kros proba ofizialen zirkuitoaren barruan dago. Gainera, ondokoen egutegi ofizialen barruan ere badago: Atletismoko Espainiko Errege Federazioa, Euskadiko Atletismo Federazioa eta Bizkaiko Atletismo Federazioa. Zornotza Krosa ANOCen, Kros Antolatzaileen Nazioarteko Elkarteren, barruan ere badago. Honek Estatuan egiten diren proba nagusiak biltzen ditu.

Errege Magoak Amorebieta-Etxanora helduko dira musikaz, argiz eta ilusioz beteriko karrozetan

2019/01/03
• Larunbatean, urtarrilak 5, kabalgata arratsaldeko 18.00etan hasiko da Biarritz industrialdean eta Herriko Plazan amaituko da, non umeak Errege Magoekin egoteko aukera izango duten • Herritar guztiek parte hartu ahal izango dute argiz, musikaz eta gozokiz betetako kabalgatan

Amorebieta-Etxano, 2019ko urtarrilaren 3an. Hiru Errege Magoak Amorebieta-Etxanora helduko dira larunbatean, urtarrilak 5, kabalgatan. Meltxor, Gaspar eta Baltasar herrira helduko dira musikaz, argiz eta ilusioz beteriko hiru karrozetan. Honez gain, beste karroza bat ere egongo da fantasiaz beteta datorrena umeei harritzeko.

Kabalgatan herritar guztiak parte-hartzeko dei egin nahi da, gazte zein nagusi, zornotzar guztiak harrituko baitu.

Kabalgata arratsaldeko 18.00etan hasiko da Biarritz industrialdean eta handik, Gudari kalerantz joango da, San Migel kaletik pasatu eta Herriko Plazan amaituko da. Bertan, ume guztiak beraiekin egoteko aukera izango dute euren eskutitza emateko edota azken orduko desioak eskatzeko.

Olga Sanchez. KONTARI & KANTARI. Musikoterapia

2019/01/11
Kontari eta Kantari musika tailer bat da, ipuinak eta musika batera dantzatzen. Ahotsa, tresnak eta gorputza.

Urtarrilaren 19an. 12.00.

2 eta 6 urte bitarteko haurrentzat.

Amaieran haurrek tresnak joteko aukera izango dute.

Izena eman behar da. Haurra heldu batekin etorriko da.

Asteburuetan IKASGELA zabalik

2019/01/29
Ekainaren 16ra arte.

Zapatuetan 10.00-14.00 / 16.00-21.00
Domeketan                     / 17.00-20.00

Aste Santuan (apirilaren 18,19,20,21,22) ZABALIK 

Herri kiroletako topaketa arrakastatsua Larrea kiroldegian

2019/01/31
Eskola mailako Herri Kirolen txapelketako topaketa izan zen joan den igandean. Bizkaiko Foru Aldundiak antolatua, Bizkaiko Herri Kirolen federazioak babesa izan zuen ekitaldiak.

Joan den igandean, urtarrilak 27, goizeko 11:30ean ekin zioten Durangaldeko eta inguruetako bejamin eta alebin kategorietako gaztetxoek eskola mailako Herri Kirolen Txapelketako 2018-2019 denboraldiko topaketari.

Durangaldeko eta inguruko benjamin eta alebin kategorietako taldeak bildu zituen ekitaldiak, eta bertan izan ziren Ama ikastetxea, Andra Mari Ikastola eta Larrea eskolako taldeak ere.

Giro ezin hobean jardun zuten benjamin eta alebin kategorietako seina taldek, guztira 100 partaidetik gora izanik Bizkaiko Foru Aldundiak antolatuta, Bizkaiko Herrik Kirol federazioren babespean gauzatzen den ekimen gero eta arrakastatsuago honetan.

Pirritx, Porrotx eta Marimotots ikusteko sarrerak agortuta

2019/02/07
Musua ikuskizuna Amorebieta IV frontoian eskainiko dute martxoaren 1ean 17:30an

Martxoaren 1ean Pirritx, Porrotx eta Marimotots Amorebieta-Etxanora hurbilduko dira azken urteetan bezala. Oraingoan "Musua" ikuskizuna aurkeztuko dute arratsaldeko 17:30an Amorebieta IV frontoian.

Aurten sarrerak otsailaren 8tik aurrera salduko dira www.ametx.eus webgunetik eta Zornotza Aretoko makinan. Horrela edozein ordutan erosi ahal izango dira eta sortzen ziren kolak saihestu.

Sarrerak bi gunerako erosi ahal dira:

PISTA: 3 urtetik gorakoentzat. Jesarleku barik. Prezioa: 6€

GRADAK: Jesarlekurekin. Adin guztietarako. Prezioak: 3 urtera arte 3€/ 3 urtetik gorakoentzat 6€ (Adina atean bertan egiaztatuko da)

SARRERAK HEMEN EROSI

VADEMEKUN. Zirkozaurre. Irakurzaletasuna parteketzeko zirko ikuskizuna

2019/02/01
Otsailak 9. Zelaieta Zentroan. 17.30

Kontzertu Gelan.

Liburutegi zahar baten girotua. Pertsona bakarreko ikuskizuna.

4 urtetik gorakoentzat.

Ez da aldez aurretik izenik eman behar. Sarrera doan.

 

 

 

Korrika egiteko lau zinta berri Larrea kiroldegian

2019/02/11
Larrea kiroldegiko fitness gimnasioaren prestazioak hobetzeko neurrien lehenengoa da hau. Bizikleta eta muskulaziorako makina gehiago ere izango da bertan luze gabe, eta espazioaren berrantolaketa ere bai, egokitze lanak egiten direnean.

Larrea kiroldegiko fitness gimnasioaren erabilzeraren zenbaterainokoari eta erabiltzaileen eskariei erreparaturik, espazio honetako baliabideakareagotzeari ekin zaio 2019an.

Lehenengo fase honetan, korrika egiteko lau zinta berri ekarri dira, eta luze gabe bizikleta eta muskkulaziorako makina gehiago ere izango da.

Makina berri hauek, oso motor indartsua izanagatik ere, ia ez dute zaratarik egiten, eta benetan eroso gertatzen dira erabilera intentsiborako.

Eskaintzen dituzten prestazioak ere aipatzekoak dira. Izan ere, ukipen-teknologiaren bidez baliatu ahalko dute erabiltzaileek makinaren edukia, entrenamenduen programazio zehatzago baterako. Bestalde, ariketa egitea entretenigarriago bilakatze aldera, konektibotasun altua daukate Interneten zehar ibiltzeko, eta gizarte-sareen bidezko partekatzeak gauzatzea ahalbidetzen dute.

 

AMODIOZKO IPUINAK. Ipuin-kontalaria helduentzat.

2019/02/12
Maite Arrese (ahotsa) & Mau Ziemkiewick (bibolina)

Otsailak 14. 19.00

“Zornotzan JAN ALAI” lehiaketaren zortzigarren edizioan izena emateko epea zabalik dago

2019/02/15
Epea: Martxoaren 29ra arte (egun hau barne)

Amorebieta-Etxanoko Jan Alai lehiaketaren edizio berria, “Zornotzan Jan Alai 2019”, gero eta hurbilago dago eta ostalariek martxoaren 29ra arte (egun hau barne) izango dute izena emateko aukera.

Deialdiaren oinarriak eta lehiaketan izena emateko orria Zelaieta Zentroko harreran eskuratu daitezke eta baita ondoko web orrietan ere: www.amorebieta-etxano.eus eta www.ametx.eus

Pintxo berritzailerik onenari 1.000 euroko saria emango zaio eta baita pintxo herrikoirik onenari ere. Zerbitzaririk profesionalena ere aukeratuko da. Gainera, 500 euro zozketatuko dira bezeroen artean eta pintxoen Top Ten-a ere egingo da.

Amorebieta-Etxanoko Udalak, ostalaritza sustatu eta dinamizatzeko berriro ere ekintza honen aldeko apustua egiten du, aurrekoetan herrian oso harrera ona izan baitu.

Eman izena!

Pirritx, Porrotx eta Marimototsek hasiera emango die Amorebieta-Etxanoko inauteriei

2019/02/21
• Ekintzak martxoaren 1ean hasiko dira. Egun horretan Perubele etorriko da. • Antzerkia, dantza, musika eta mozorroak, guzti hauek ez dira faltako Amorebieta-Etxanoko inauterietan

Amorebieta-Etxano, 2019ko otsailaren 21a. Amorebieta-Etxanoko Udalak hainbat ekitaldi antolatu ditu inauterietarako. Horrela, martxoaren 1etik 5era, zornotzarrek hainbat kultur ekitaldi izango dituzte kaleak girotzeko. Jai parte-hartzaile batzuk antolatu nahi dira, herritar guztientzat baina bereziki txikienei zuzenduak.

Ostiralean, hilak1, Pirritx, Porrotx eta Marimotots pilotalekuan jarriko den taula gainean izango dira arratsaldeko 17:30etik aurrera.

Beranduago, 19.00:00etan, Zelaieta parkean, Perubeleren aurkezpena egongo da eta ondoren jaietako protagonista nagusia den honekin kalejira bat egingo da. Ibilbidean zehar Udazken taldeko dultzaineroak eta Zaparrada batukada izango ditu bidelagun eta parte hartzen duten guztiak animatuko dituzte.

19:30etik aurrera atseden hartu ahal izango da Zelaieta parkean jarriko den karpan eta han zornotzarrek txorizoa eta sagardoa jan eta edan eta ordu erdi beranduago Urrats taldeak ekingo dion erromeriarako indarrak hartu ahal izango dituzte.

Eguneko azken hitzordua Zornotza Aretoan izango da. Hemen, 20:15etik aurrera “7ak bat”antzezlana ikusi ahal izango da.

Larunbatean, hilak 2, 12:00etatik aurrera inauterietako dantzak ikusi ahal izango dira herriko kaleetan, Udabarri dantza taldearen eskutik. Arratsaldean Zelaieta parkean Tomaxen abenturaken “10 urte” ikuskizuna ikusi ahal izango da eta bi ordu beranduago, leku berean, berbena egongo da La Basu eta Ibai DJ-arekin.

Arratsaldeko zortzietan Triki Piu trikitilarien ibilbidea hasiko da. Herri guztian zehar ibiliko dira kaleak girotzen. Gainera, egun guztian zehar mozorro lehiaketa egongo da. Luis Urrengoetxea kaleko ostalariek antolatu dute eta gaiak komikietako pertsonaiak izango da.

Igandean, hilak 3, Malas compañías antzerki zirkoak "Prozac” antzezlana antzeztuko du 18:00etan.

Martxoaren 4an, astelehenean, Zornotzako umeek hainbat jolas izango dituzte Zelaieta parkean 17:30etik aurrera eta baita kontzertu akustiko bat ere, Zornotzako Gazteek antolatuta.

Inauterietako asteartea
Inauteri egunean, hilaren 5ean, 17:00etatik aurrera Zelaieta parkean Eidaberen “Txapela buruan eta dantza munduan” antzezlana ikusi ahal izango da.

19:00etatik aurrera, inauterietako kalejira hasiko da, Udazkeneko dultzaineroekin. Ekitaldi hau Zelaieta parkean hasiko da. Hemen datorren urtera arte esango zaio agur Perubeleri eta erre egingo da. Txikienentzat txokolatada ere egongo da (19:30ean).

Azkenik, Nai imaginazioak taldeak “Mugi Dubi Doo dantzan” ikuskizuna ekarriko du Amorebieta-Etxanora, 19:30ean, Zelaieta parkean.

Kaleko kirol egituretan esku hartze programa

2019/02/22
Hainbat dira udalerrian kirolean jarduteko dauden azpiegiturak. Ahalegin berezia egingo da bitarteko horiek baldintza egokietan mantentzeko. Hiritarren kolaborazioa ezinbestekoa da.

Nonahi aurki ditzakegu Amorebieta-Exano udalerrian kirolean jarduteko azpiegiturak eta tresnak: frontoiak, futbitorako eta saskibaloirako kantxak, paseatu bitartean ariketak egiteko aparatuak...

Kalean egoteak edozein unetan, bakarka nahiz lagunekin, erabiltzeko parada ematen digu eta aukera hori baliatu ahal izateko, egoera onean aurkitzea da guztion gogoa. Horrela, Ametx erakunde autonomoaren kirol zerbitzuak ahalegin berezia egiten ari dira egitura eta espazio horiek baldintza egokietan egon daitezen. Horren azken adibide ditugu Ogenbarrenan eta Nafarroan konpondu berriak diren saskibaloiko kanastak.

Aire zabalean egote horrek elementuen narriadura eta kaskartze handiagoak dakartza berez ere eta horregatik dauka garrantzi berezia guztionak diren ondasun horiek behar bezala erabiltzeak batetik eta hiritarrek, egoera txarrean aurkitzen dituztenean, horren berri ematea bestetik. Horretarako, nahikoa da 688 866 600 telefono zenbakira whatsapp bat bidaltzea, konponketa lanak bideratuak izan daitezen.

 

Zabalik dago apiriletik ekainera bitarteko kirol jardueretan izena emateko epea

2019/02/25
Ametx erakundearen web bidez izena eman ahal da formulario bat betez. • Era berean, ikastaroetan lekua esleitzen zaien eskatzaileek on line egin ahal dute ordainketa.

EPEAK

Aurre matrikula: Otsailaren 25etik martxoaren 8ra

Zozketa: Martxoaren 12an, 12:00etan

Aukeratuen zerrenda: Martxoaren 14an

Ordaintzeko epea: Martxoaren 22ra arte

Esleitutako leku hutsen ordainketa: Martxoaren 26an eta 27an

Geratzen diren lekuen esleipena: Martxoaren 28tik aurrera

 

Izena emateko esteka hau klikatu: Izen-ematea

Amorebieta-Etxanok Emakumeen Nazioarteko Eguna ospatuko du

2019/02/25
• Antzerkia, tailerrak eta hitzaldiak izango dira martxoaren 8ko programazioaren protagonista. • Martxoaren 9an Zubiondo parkean Emakume Nekazari eta Artisauen XXII. Azoka egongo da.

Amorebieta-Etxano, 2018ko otsailaren 22a. Amorebieta-Etxanoko Udaleko Berdintasun Sailak hainbat ekintza antolatu ditu martxoaren 8a , Emakumeen Nazioarteko Eguna, ospatzeko. Programazioan antzerkia, tailerrak, ipuin kontalariak, hitzaldiak, etab. aurki ditzakegu.

Asteazkena, martxoak 6
Programazioa martxoaren 6an hasiko da klown antzerki ikuskizun batekin, gazte eta helduentzat.

Virginia Imazek zuzentzen duen Oihulari Klown antzerki taldeak klown parodia bat taularatuko du: “Sex no sex” . Protagonista Pauxa da, bizitzari, heriotzari eta sexuari buruz bere buruari galdetzen dion pailazoa. Publikoa bere gogoeten konplize eta testigu izango da. Sexuan hasiera batean izandako esperientziak partekatuko ditu, giza harremanei buruz dituen kezkak azalduko ditu eta baita harreman osasuntsuak kudeatzeko zailtasuna ere. Guzti hau genero ikuspuntu batetik egiten du.

Hitzordua Zornotza Aretoan izango da 19:00etan.

Osteguna, martxoaren 7a.
Oihana Azkorbebeitiak (mendi trail korrikalariak) “Mendiaren Altzoan” izeneko hitzaldi bat emango du martxoaren 7an, osteguna. Sarrera doakoa izango da eta hitzaldia 20:00etan hasiko da Harrison 6-9 eraikinean. Koralak antolatu du.

Ostirala, martxoak 8
Emakumeen Nazioarteko Egunaren ardatza 13:00etan Herriko plazan egingo den elkarretaratzea izango da. Elkarretaratzearen ondoren, erakunde adierazpen bat irakurriko da.

17:00etan ludotekan eskulan tailer bat egingo da “Aparteko emakumeak” izenburupean eta, ordubete beranduago, Gaztetxokoan txapa tailer bat egingo da.

Larunbata, martxoak 9
Larunbatean Ana Galarragak “Marikalanbre bizitzaren laborategian” izeneko ipuin kontaketa saioa gidatuko du. 12:00etan izango da udal liburutegian.
Zubiondo parkean Emakume Nekazari eta Artisauen XXII. Azoka egongo da goizez. Euskal Herriko hainbat lekutatik etorriko dira emakumeak produktu aukera zabalarekin: ogia, ahatearen ingurukoak, gozogintza, marmeladak, fruta-gozokiak, etxean egindako hanburgesak, barazkiak, gazta eta esnekiak, bitxigintza, larrua, zeramika, arropak edota birziklatutako osagarriak, etab. Era berean, txosna bat jarriko da janari eta edariarekin.
Azoka inguruan, musika, kirol erakusketa, txistulariak, trikitilariak eta nesken herri kirolak egongo dira (Harriti taldea). Dantza erakusketaz Udabarri Dantza taldea arduratuko da.

Amorebieta-Etxanoko Udalak aurrekontu parte-hartzaileetarako herritarren proposamenak jasoko ditu

2019/02/26
• Martxoaren 1etik aurrera, zornotzarrek beraien ekarpenak egin ahal izango dituzte, 2020ko kontuetan sartzeko • Inbertsioen %25 aurrekontu parte-hartzaileetan egingo diren proposamenen proiektuetarako izango da, hau da, 840.000 euro

Amorebieta-Etxano, 2019ko otsailaren 26a. Amorebieta-Etxanoko Udalak datorren ostiraletik aurrera, martxoak 1, batuko ditu zornotzarrek datorren urteko aurrekontu parte-hartzaileetan jaso nahi dituzten proposamenak.

Prozesu irekia da eta herritarrek beraien ekarpenak egin ahal izango dituzte eta adierazi nola nahi duten erabili Udalaren aurrekontuaren zati bat. Proposamenak 2019ko apirilaren 17ra arte aurkeztu ahal izango dira. Horretarako inprimaki eredua  webgunean (https://www.ametx.eus/aurrekontu-parte-hartzaileak), Herritarren Arreta Zerbitzuan eta Zelaieta Zentroan eskuratu ahal izango da.

Aurrekontu parte-hartzaileetarako aurrekontu zuzkidura 2020rako aurreikusitako inbertsioen %25ekoa da, hau da, 840.000 euro. 2019ko apirilaren 23tik irailaren 30era, udal sailek proposamenen edukia aztertuko dute ikuspuntu tekniko, juridiko eta ekonomikotik. Aipatu hiru baldintzetariko bat betetzen ez duten proposamenak ez dira hurrengo fasera pasatuko. Baliozkotzen ez direnak, dagokion udal sailak egindako lehentasun hurrenkera batean geldituko dira, aurrekontuen proiektuan sartu ahal izateko. Ondoren, Udalak udal kontuetan txertatu diren proiektuen berri emango du.

173 proiektu martxan
Amorebieta-Etxanoko Udalak, zornotzarrek herriko bizi kalitatea hobetzeko aurkezten dituzten beharrizanak aintzakotzat hartzeko konpromisoari eusten dio.

Zentzu honetan, azpimarratu beharra dago Udalak 2019ko aurrekontu parte-hartzaileetan 405.900 euro erabili dituela guztira, zornotzarrek aurkeztutako proposamenak martxan jartzeko.

Partida honi esker 173 auzo ekintza gauzatu ahal izan dira. Hauen artean ondokoak azpimarratu daitezke: bidegorri sarea, Amorebieta-Etxanon bizikletan ibiltzeko sare bat jartzeko proiektu estrategiko bat; ikasteko gela bat jarri Konbenio kalean; Legarrebi eta Ogenbarrena urbanizatu; Larrea eta Arraibiondoko jolas gune berria; Larreako gimnasioa handitu edo Dudeako San Migeleko eskolak birmoldatu.

Amorebieta-Etxanok bizikletak garbitzeko gune bat martxan jarri du Gure Kirolaken

2019/03/01
• Bizikletak astelehenetik igandera 08:00etatik 22:00etara garbitu ahal izango dira. • Aurrekontu parte-hartzaileen bidez bizikletak garbitzeko leku ordenatu eta kontrolatu bat eskatzen zuten zornotzarrei erantzun nahi die honekin Amorebieta-Etxanoko Udalak.

Amorebieta-Etxano, 2019ko martxoaren 1a. Amorebieta-Etxanoko Udalak herrian dagoen bizikletak garbitzeko lehenengo gunea martxan jarri du. Gune hau Gure Kirolakeko pilotalekuaren alboan dago.

Zerbitzua gaurtik aurrera zabalik egongo da eta oso erabilgarria izango da mendian bizikletan ibili ondoren euren bizikleta garbitu nahi dutenentzat.

Instalazioa erabili nahi dutenek, Ametxeko txartela erabili beharko dute. Ez daukatenek, https://www.ametx.eus/eu/aurkezpena/tramiteak/ametx-txartela helbidean eskatu dezakete edo aurrez aurre, Larrea kiroldegian edo Zelaieta Zentroan.

Lehendik edozertarako Ametx txartela erabiltzen dutenek, zerbitzu honetarako aktibatzeko eskatu ahalko dute Zelaieta zentroan edo Larrea kiroldegian, edo helbidera mezu elektronikoa bidalita.

Bizikletak garbitzeko gunea astelehenetik igandera 08:00etatik 22:00etara erabili ahal izango da. Zerbitzu berri hau martxan jarrita, Amorebieta-Etxanoko Udalak erantzun egiten dio zornotzarrek aurrekontu parte-hartzaileetan egindako eskari bati. Herritarrek bizikletak modu ordenatu eta kontrolatuan garbitzeko leku baten beharrizana aipatzen zuten aurrekontu parte-hartzaileetan. Instalazio hau jartzeko egin den inbertsioa 25.000 eurokoa izan da.

Ibiliaz ezagutu. Ibilaldi gidatuak mendian zehar euskaraz ibiltzeko

2019/03/04
• Bizkaiko 4 naturagune babestuetan barrena ibiliko gara oraingo honetan, 12-16 kilometro inguruko ibilaldiak eginez. • Ibilaldiak martxoaren 30ean, apirilaren 6an eta maiatzaren 4an eta 11n izango dira, goizeko 8:00etan hasita. • Autobus zerbitzua izango da etapak hasten eta amaitzen diren lekuetarako, eta Nafarroako parkina izango da batzeko tokia. • Zelaieta zentroan eman beharko da izena, irteerak baino bi egun arinago beranduen jota. Leku kopurua mugatua da.

Hamabi eta hamasei kilometro bitarteko lau ibilaldik osaturiko ekimena antolatu du Amorebieta-Etxanoko Udalaren mendekoa den Ametx erakunde autonomoak, Ibiliaz Ezagutu programaren barruan. Oraingoan Bizkaiko 4 naturagune babestuetan gauzatuko ditugu ibilaldiak, 12 eta 16 kilometro bitartekoak. Jarduera honetan parte hartzen dutenak, beraz, Armañon, Gorbea eta Urkiolako parke naturaletan eta Urdaibaiko Biosferaren Erreserban barrena ibiliko dira.

Ibilaldiak martxoaren 30ean, apirilaren 6an eta maiatzaren 4an eta 11n izango dira, goizeko 8:00etan hasita. Etapa guztiei emango zaie hasiera Nafarroako parkinean eta autobus zerbitzua izango da bertatik ibilaldien hasiera puntura iristeko eta behin amaituta ere, Amorebietara itzultzeko. Honakoak izango dira, zehazturik, lau larunbat horietan egingo diren ibilaldiak:

Martxoaren 30ean, Ipazter-Aulestia (12 km): Urdaibaik baditu aski ezagun diren kostaldeko ingurune ederrak, hondartza, portu eta kai paregabeak hain zuzen ere. Oraingoan, baina, altueretara joko dugu bertako basoak, landak eta baserriak ezagutzeko asmotan.

Apirilaren 6an, Ranero-Turtzioz (12 km): Bizkaia lurralde historikoan, mendebaldea dugu harribitxi ezezagunena. Huts hori zuzendu nahian antolatu da ibilbide hau Armañon natura parkean barrena, bertako inguruek eta bazterrek liluratuko gaituztelako segurtasunean.

Maiatzaren 4an, Otxandio-Arrazola (16 km): Anbotoko Dama den gure Mari ahaltsua lar molestatu gabe, ahaleginak egingo ditugu Urkiola inguruetako pagadiak, errekak, ur-jauziak… ezagutzeko. Jendez hain gainezka ez dauden bidezidorrak baliatuko ditugu zeregin horretan.

Maiatzaren 11n, Murua-Ubidea (13 km): Gorbeiako gurutzearen begiradapean berak babesten duen lurralde basati honetan murgilduko gara, hain arretatsu gordetzen dituen sekretuetako batzuk azalarazteko. Izugarri politak diren errekak, bideak eta bidezidorrak erabiliko ditugu horretarako.

Zelaieta zentroan eman beharko da izena, irteerak baino bi egun arinago beranduen jota. Leku kopurua mugatua da.

Jarduera fisikoaren onura, orohar, berekin dakarren arriskua baino handiagoa da. Nolanahi ere, ariketa fisikoa egiten duen orok jakin beharra dauka jarduera horiek eguneroko bizimoduan arriskurik gabe txertatzen, eta segurtasuna bermatzeko neurriak hartzen.

"El viajero" erakusketaren aurkezpena martxoaren 13an izango da

2019/03/11
Datorren asteazkenean, martxoaren 13an, Lakak bere "El viajero" erakusketaren aurkezpena egingo du Zelaietako erakusketa gelan arratsaldeko 19:00etan. Gonbidatuta zaudete!

Euskaraldiko azken galdetegia betetzeko epea zabalik

2019/03/20
Martxoaren 30era arteko epea dago 3. galdetegia betetzeko eta irailerako atera nahi ditu azken emaitzak Soziolinguistika Klusterrak

Iazko azaroaren 23tik abenduaren 3a egin zen EUSKARALDIA lehenengo aldiz: 225.000 lagunek hartu zuten parte, ahobizi edo belarriprest rola hartuta. Ariketa hark eragindakoa eta utzitako ondorioak aztertzeko asmoz, ikerketa bat jarri zuen martxan Sozilinguistika Klusterrak, eta uda osterako espero dituzte emaitzak. Ikerketa hori egiteko, hiru galdera sorta prestatu zituzten, teknika kuantitatiboak zein kualitatiboak erabiliz. Zabalik da hirugarren galdetegia betetzeko epea.

Galdetegia betetzeko: https://izenematea2.euskaraldia.eus/hirugarren-galde-sorta

Zinema, Zornotza Aretoaren 25. urteurrenaren protagonista

2019/03/21
• Datorren asteartean, martxoak 26, zinemari buruzko hitzaldi bat egongo da Aretoan, doakoa eta publiko guztientzat. • Hitzaldian Lara Izagirre, Arkaitz Basterra, Gaizka Bourgeaud eta Rafa Escolarrek parte hartuko dute.

Amorebieta-Etxano, 2019ko martxoaren 21. Zornotza Aretoak 25 urte bete ditu eta ospatzeko, Ametx Erakunde Autonomoak hainbat ekintza antolatu ditu. Oraingoan, zinema izango da datorren astearteko, martxoaren 26ko, protagonista.

Aretoan hainbat soinu banda entzun ahal izango dira eta baita zinemari buruzko hizketaldiak ere. Hainbat artista bilduko dituen tertulia musikal bat egongo da. Bereziki, ondoko zinemagileak aipa daitezke: Lara Izagirre, Arkaitz Basterra, Gaizka Bourgeaud eta Rafa Escolar.

Lara Izagirrek bere lehenengo filma Amorebieta-Etxanon grabatu zuen eta Goya bat irabazi zuen. Arkaitz Basterra zuzendaria bere dokumentalengatik da ezaguna; Gaizka Bourgeaud fotografia-zuzendaria izan da hogeita hamar bat filmetan eta Rafa Escolar, Zornotzako zuzendari multifazetikoa da, ozeanoa zeharkatuko duena ekitaldi honetan egoteko. Maite Etxeita kazetariak gidatuko du hitzaldia eta Miren Eelesek zuzeneko musika jarriko du.
Interesa duten guztiek parte hartzeko aukera izango dute, doan, aforoa bete arte.

Amorebieta-Etxanok bere jaietako pertsonaia marrazten du

2019/03/25
• Gaur hasi eta maiatzaren 31ra arte, herriko jaietako pertsonaia sortzeko aukera izango dute zornotzarrek. • Proiektua irabazten duenari 3.000 euroko saria emango zaio.

Amorebieta-Etxano, 2019ko martxoaren 25a. Amorebieta-Etxanoko Udalak herriko jaietarako pertsonaia bat sortzeko lehiaketaren oinarriak martxan jarri ditu gaur. Sorkuntza lan horrek Amorebieta-Etxanoko bizimodu, historia eta ohiturak bildu behar ditu.

Lehiaketan norbanakoek eta taldeek parte hartu ahal izango dute, formatu librean. Azken produktua album ilustratu moduan argitaratuko du. Hortaz, irudiak eta testua izango ditu. Lehiaketa honetan aukeratuko den pertsonaia urtero egiten diren jaietako karteletan erabiliko da eta baita jaietako batzordearen ustez egokia izan daitekeen gainontzeko produktuetan.

Lanak 2019ko maiatzaren 31ra arte aurkeztu ahal izango dira. Epaimahaia ondokoek osatuko dute: arte plastikoetan aditu batek, argitaletxe bateko ordezkari batek, herriko artista batek eta Ametx Erakunde Autonomoko presidenteak. Guzti hauek izango dira proposamenak aztertuko dituztenak eta ekainaren 28an beraien erabakia jakinaraziko dute. Proiektua irabazten duenari 3.000 euroko saria emango zaio.

400 ikaslek baino gehiagok beraien etorkizuna zehaztuko dute, Amorebieta-Etxanoko Udalak antolatutako II. Enplegu eta Formazio Azokan

2019/03/26
• Bizkaiko Foru Aldundiak diruz lagunduko du martxoaren 28an Zelaieta Zentroan egingo den jardunaldi hau. • Prestakuntza azokak ondokoak izango ditu: LEGO Serious Play tailerrak, etorkizuneko sektore ekonomikoei buruzko hitzaldiak, bisita gidatuak ikasle eta gurasoentzat eta ikasketa zentroetako standak. • Enplegu azokan enpresa standak egongo dira lana bilatzeko.

Amorebieta-Etxano, 2019ko martxoaren 20a. Amorebieta-Etxanoko Udalak Enplegu eta Formazio Azokaren bigarren edizioa antolatu du. Martxoaren 28an izango da, osteguna, Zelaieta Zentroan.

Jardunaldiak bi arlo izango ditu. Batetik, Enplegu Azoka, lan bila dabiltzanen eta enpresen topagunea izan nahi duena. Bestetik, Formazio Azokak gaur egun dagoen prestakuntza eskaintza erakutsi nahi du.

Formazio Azoka

400 ikaslek baino gehiagok Formazio Azoka bisitatuko dute eskaintzen diren prestakuntza ikastaroen berri izateko, lan merkatuak dituen beharrak eta eskatzen dituen profilak kontuan izanda. Era berean, lan bizitza guztian zehar prestakuntzak duen garrantzia azpimarratuko da.

Azoka honek hainbat talderentzat proposamenak izango ditu: DBH4ko ikasleak, Batxilergoko 1 eta 2. mailetako ikasleak, lanean dabiltzan langileak edo langabezian daudenak, enpresariak edo gurasoak.

Jardunaldian Lanbide Heziketako 9 ikastetxe egongo dira, 5 unibertsitate eta 5 hizkuntza ikastetxe. Lego Serious Play tailerrak antolatu dira lanera begira, etorkizuneko okupazioei buruzko hitzaldiak ikasle eta gurasoentzat eta azoka ikusteko bisita gidatuak. Jarduera guzti hauen ordutegia hau izango da: 9:30-14:30 eta 17:00-19:00.

Enplegu Azoka

Enplegu Azokak lan bila dabiltzanen eta enpresen arteko topagunea izan nahi du. Gune honetan 12 stand egongo dira lan bila dabiltzanei orientazioa emateko. Aukera egongo da enpresak zuzenean ezagutzeko eta Enplegu Azokan standa duten industria eta zerbitzu enpresen beharrizanak zuzenean ezagutzeko.

Ordutegia hau izango da: 10:00-14:00 eta 17:00-19:00.

Zabalik dago 2019ko udalekuetan izena emateko epea

2019/04/01
• Kanpaina 4 eta 10 urteko umeei zuzenduta dago. • Datorren astelehenetik apirilaren 30era arte umearen izena eman ahal izango da, ekainerako eta uztailerako antolatutako ekintzetan parte hartzeko.

Amorebieta-Etxano, 2019ko apirilaren 1a. Amorebieta-Etxanoko Udalak datorren astelehenean, apirilaren 1ean, zabalduko du 4 eta 10 urte arteko umeak 2019ko udalekuetan izena emateko epea.

Udalekuak ekainaren 24an hasiko dira eta uztailaren 19ra arte egongo dira. Izena eman nahi dutenek asteka egin dezakete, hainbat ordutegi daude eta jantoki zerbitzua ere eskainiko da. Aukeraren arabera, udalekuen prezioa ere aldatu egiten da.

Kanpaina ez da bakarrik Amorebieta-Etxanon erroldatuta dauden adingabeentzat baina jende askok izena emango balu, erroldatuek lehentasuna izango dute.

Udalekuak Larreako ikastetxe publikoan egingo dira baina jarduera egitarauaren arabera, Udalaren beste kirol eta kultur instalazio batzuk erabiliko dira.
Gazte Informazio Bulegoan izena eman ahal izango da (10:00 - 13:00 eta 17:00 - 20:00) apirilaren 30era arte.

YOGIPUINAK

2019/04/01
Ipuinak + yoga. 5-10 urteko haurrentzat. Apirilak 6, 12.00. Gonbidapena beharrezkoa da (Liburutegian hartu)

Yoga hitzaren esanahia lotura da.Oraingo honetan yogak eta ipuinak bat egiten dute.

Gorputza, emozioak eta adimena landuko dira.

Saioaren amaieran erlaxatzeko unea egongo da, irudi erlaxanteak erabilita haurrek beldurrei aurre nola egin ikasiko dute.

Zelaieta zentroak Santiago Yanizen “Bizkaia Izadi sublimea” erakusketa hartuko du

2019/04/02
• Bost lekuei buruzko argazkiak bilduko ditu erakusketak: San Juan de Gaztelugatxeko ingurua; Otxarretako basoak, Gorbeiako natura parkean; Getxo eta Barrika udalerrien arteko kostaldea; Urkiola Parkea eta Belaustegiko ur jauziak (Gorbeiako natura parkean). • Erakusketa honekin batera, “Euskal Herria ahaztezina / Euskal Herria inolvidable” ikusgai egongo da eta ondoren, hitzaldi bat egongo da ostegunean, apirilaren 4an 19.00etan.

Amorebieta-Etxano, 2019ko apirilaren 2a. Amorebieta-Etxanoko Zelaieta zentroak Santiago Yanizen “Bizkaia Izadi sublimea” erakusketa hartuko du maiatzaren 3ra arte. Argazkilari bilbotar honen erakusketa honetan bere argazkilari lanaren zati bat erakusten du, hain zuzen ere bost lekuei buruzko argazkiak: San Juan de Gaztelugatxeko ingurua; Otxarretako basoak, Gorbeiako natura parkean; Getxo eta Barrika udalerrien arteko kostaldea; Urkiola Parkea eta Belaustegiko ur jauziak (Gorbeiako natura parkean).

Santiago Yaniz, bilbotarra, argazkilaria eta kazetaria 1980tik. Argazkilaritzarako grina izugarria izan du beti, eta Euskal Herriko paisaiak, mendiak eta natura jaso ditu erretratuetan, aldizkari eta liburu askotarako, ehunka egile-lan eta erreportaje ilustratuz. Ezin nekatuzko ibiltari eta bidaiari honek mendi eta paisaia naturalaren irudia izan du espezialitaterik gogokoenetako bat. Gainera, haren lan profesionalaren kokapen nagusia dela eta, Bizkaiko eta Euskal Herri osoko txoko eta bazter guztiak ezagutu ahal izan ditu, eta haiek miresteko argirik eta unerik egokienak ere bai.

Haren artxiboan, 500.000 iruditik gora daude bilduta, lur honetako paisaiei, naturari eta pertsonei lotuak. Argazkilaritzako estilo soilekoa, nahiago izaten du artefaktu teknikoak saihestu, eta, gehienbat, lurra ikertu, argiak kudeatu, eta meteorologiak eskaintzen dizkigun une iragankorrei ahalik eta etekinik handiena atera, giro iradokitzaileak lortzeko.

Erakusketa hau Bizkaiko Foru Aldundiaren erakusketa ibiltarien programaren parte da.

Erakusketa honekin batera, “Euskal Herria ahaztezina / Euskal Herria inolvidable” ikusgai egongo da eta ondoren, hitzaldi bat egongo da ostegunean, apirilaren 4an 19.00etan.

Lehen Sorospenen ikastaroa Larrea kiroldegian

2019/04/08
ASFEDEBIk eskainiko du, Bizkaiko Foru Aldundiaren eta Ametx erakunde autonomoaren lankidetzarekin. 30 orduko ikastaroa izango da, 20 ordu on line eta 10 ordu presentzial, egun batean egitekoak. Luze gabe indarrean sartuko den legea betetzea erraztuko die kirol arloan dihardutenei (boluntarioak barne).

Lehen Sorospenen ikastaroa eskainiko du ASFEDEBIk Amorebieta-Etxanon, Bizkaiko Foru Aldundiko Euskara eta Kultura Saila eta Amorebieta-Etxanoko AMETX ERAKUNDE AUTONOMOArekin elkarlanean.

HELBURUA: Euskal Autonomia Erkidegoan Kirolarekin Lotutako Lanbideen Lege Proiektuaren 15. Artikuluak, adierazten duen lehen sorospenetako gutxieneko konpetentzia betetzea erraztea. Lege horrek boluntarioei ere eragingo die.

Gutxieneko adina: 16 urte

Ikastaroaren ordu kopurua: 30 ordu.

20 ordu on-line

Beste 10 orduak, aurrez-aurrekoak. Asistentzia nahitaezkoa.

Kurtsoaren hasiera: Maiatzaren 10ean.

Kurtsoaren hizkuntza: Aukerakoa, euskaraz edota gaztelaniaz. Matrikula egitean AUKERATUKO DUTE ikaslegaiek. Lehentasuna emango zaie euskarazko matrikulei.

Aurrez-aurreko eguna: Maiatzaren 25 larunbata.

Aurrez-aurreko orduak: 9:00 – 14:00 eta 15:00 – 20:00.

Non: Larrea Kiroldegia, Larrea Auzoa z/g (48340 Amorebieta –Etxano).

Matrikulazio epea: Apirilaren 10etik maiatzaren 8ra (biak barne).

Ikastaroaren prezioa: 75€.

Matrikula egiteko jarraibideak: Bete eta sinatu izena emateko formularioa  eta saio presentzialetara joan ahal izateko informatutako baimena eta bidali, matrikularen ordainagiriarekin batera, ikaslearen NAN-a jarriz, hurrengo helbide elektronikora: formakuntza@asfedebi.eus

Izena emateko orria

Ordainketa orria

Informatutako baimena_Adin nagusikoak

Informatutako baimena_Adin txikikoak

Proiektuari buruz gehiago jakin nahi izanez gero: IKUSI BIDEO HAU

Informazio gehiago:

www.asfedebi.eus

/ 944.037.800 - 944.423.960

kirolak@ametx.eus

Asteazken honetan Zornotza Aretoan ikusgai egongo da duela gutxiko Amorebieta-Etxanoren historiari buruzko dokumentala

2019/04/08
• “Zornotzarra naz eta harro nago” izenburua duen filma asteazken honetan ikusi ahal izango da, apirilak 10, 20:00etan. • Dokumentalak herrian bizi izan diren eta bizi diren hainbat lagunen testigantzak biltzen ditu eta beste hainbat arloren artean, kultura, euskara edo politikan izandako beraien esperientziak kontatuko dituzte.

Amorebieta-Etxano, 2019ko apirilaren 8a. Asteazken honetan, apirilak 10, 20:00etan, Zornotzarra naz eta harro nago dokumentalaren estreinaldia izango da Zornotza Aretoan. Dokumental honek gure herriaren duela gutxiko memoria biltzen du. Amorebieta-Etxanoko ondare immaterialari hurbiletik heldu nahi zaio.

Horrela, guztira 40 elkarrizketatuk beraien oroitzapenak kontatuko dituzte, hasi Frankismoaren azken egunetan eta gaur egunera arte. Arlo ezberdinetako zornotzarren hainbat testigantzarekin, garai hartan kultura, gure zornotzar izaera, euskara eta politika nola bizi ziren gogoratuko da beste batzuen artean, eta nola joan den herria aldatuz gaur egunera iritsi arte.

Parte-hartzaileen artean Amorebieta-Etxanok demokrazian izan dituen bost alkateak egongo dira, Udabarriren sortzailea, Joxe Mari Agirre; Eneko Atxa sukaldaria, Bego Azketa El Cojo jatetxekoa, herriko ikastetxeetako ordezkariak edo kirol elkarteetako ordezkariak.

“Zalantzarik gabe Amorebieta-Etxanok bere izaera du eta proiektu honekin pertsonalitatea, izaera eta batez ere etorkizuna duen herri bat denon artean eraikitzeko gai izateak sortzen digun harrotasuna bildu eta gizarteari erakutsi nahi diogu” adierazten du Andoni Agirrebeitiak, Amorebieta-Etxanoko Alkateak.

Ekainean Zornotzako udal euskaltegian HABEren C1 maila ikastaro trinkoa

2019/04/10

Iraupena: ekainaren 3tik 28ra. 4,5 ordu egunean (08:30-13:30).

Matrikula: 90 ordu x 1,23 = 110,70 €.

Matrikula epea: maiatzaren 13tik 24ra.

Sarrera proba: maiatzaren 28an, arratsaldeko 16:00etan

Izen-ematea: Zornotza Udal Euskaltegian.

Bulego ordutegia:
Goizez: 09:00 - 13:00
Arratsaldez: 15:00 - 17:00  (barikuetan izan ezik)

Telefonoa: 94 6732026
Helbidea: San Pedro, 5

Larreako fitness gimnasioa zabalik igande eta jaiegunetan

2019/04/30
Maiatzaren 1ean hasita, zabalik egongo da Larrea kiroldegiko gimnasioa igande eta jaiegunetan. Instalazioaren ordutegia 9:00etatik 13:30era izango da.

Zuzeneko musika entzungai Amorebieta-Etxanoko ermita eta elizetan Eleizetan programarekin

2019/05/06
• Programa honen XX. edizioa maiatzaren 11n hasiko da eta herriko bost ermita eta elizetan egingo da • Kontzertuen artean: Lulavai, Alos Quartet, José Luis Nieto, Musikeneko Hazkunde hirukotea eta Begoña Olavide eta Javier Bergia bikotea.

Amorebieta-Etxano, 2019ko maiatzaren 3a. Amorebieta-Etxanoko ermita eta elizetan egingo da Eleizetan programaren XX. edizioa, herriko bost lekutan zuzeneko musikaz gozatzeko antolatutako programa.

Kontzertu ziklo honen helburua da, proposatutako musikaz gozatzeaz gain, Amorebieta-Etxanoko monumentu ondarea ezagutaraztea. Horregatik normalean Dudeako San Migel eta Boroako San Pedro ermitetan eta Bernagoitiko San Migel elizan, Larreako San Juan Bautista elizan eta Etxanoko eta Amorebietako Andra Mari elizetan egiten da.

Eleizetanen edizio berri hau maiatzaren 11n hasiko da (20:00) Andra Mari elizan, Lulavai entzun ahal izango delarik. Soinu-mundu berriak ezagutzeko jakinminak bultzatuta, musika proiektu honi ekin zioten 2008an. 4 harpa, 4 ahots, Galiziako errepertorio tradizionaleko abestiak eta baita galiziar konpositoreenak ere, kontu handiz landutako moldaketekin interpretatuz.

Egun bat beranduago Alos Quartet arituko da. Musika klasikoan nahiz modernoan esperientzia zabala duten musikariek osatzen dute taldea eta Bernagoitiko San Migel elizan joko dute 12:15ean.

Boroako San Pedro ermitan José Luis Nietoren kontzertua egongo da maiatzaren 17an (20:00). Erreferentea da nazioarte mailan aritzen diren kontzertisten artean, Espainiako musikaren figurarik esanguratsuenetako bat Estatuan bertan eta kanpoan.

Maiatzaren 18an, Musikeneko Hazkunde hirukotea arituko da Dudeako San Migel ermitan (20:00). Hirukotea ondokoek osatzen dute: Eduardo Villarroel klarinete-jolea, Burgoskoa; David Oliveria, piano-jolea, Donostiakoa eta Silvia Ruiz, fagot-jolea, Sevillakoa. Musika taldea 2018an sortu zen Euskal Herriko Goi Mailako Musika Ikastegian (Musikene). Edizio honetako azken kontzertuko protagonistak Begoña Olavide eta Javier Bergia dira. Garitondoko San Isidro ermitan joko dute igandean, maiatzaren 19an, 12:15ean. Olavidek eta Bergiak tradizioa eta sorkuntza berria uztartzen dituzte. Ahotsak, Erdi Aroko salterioa, gitarra akustikoa eta perkusioak biltzen dituen errepertorioa eskaintzen dute.

Eleizetan programa osoa ikus daiteke ondoko loturan: https://www.ametx.eus/es/programas/eleizetan/ELEIZETANprograma2019.pdf

Amorebieta-Etxanok Enrike Renteria pintura lehiaketaren XXI. edizioa antolatu du

2019/05/06
• Zornotzarrek beraien arte lanak marraztuko dituzte eta abuztuan ikusgai egongo dira • Deialdiaren barruan egongo da Zintzilik, herriko balkoietan jarritako lanik onenak saritzen dituena.

Amorebieta-Etxano, 2019ko maiatzaren 6a. Amorebieta-Etxanon aurten ere Enrique Rentería pintura lehiaketa antolatuko da uztailan.
Lehiaketa Sociedad Artístico Cultural Zornozak antolatzen du Ametx udal kultur erakundearekin, eta aurten, XXI. edizioan, hainbat berrikuntza egongo dira.

Lehiaketan modalitate bi daude: aire zabaleko pintura lehiaketa tradizionala (uztailaren 7an bertaratu eta izena eman daiteke edo saczornoza@gmail.com helbidera posta elektroniko bat bidali) eta Zintzilik, herriko balkoietan ikusgai jartzen diren lanik onenak saritzen dituena (maiatzaren 8tik aurrera izena eman daiteke).
Aurten gainera, uztailaren 7an, lehiaketa egunean, 14 urtetik beherako neska-mutikoentzat gune bat egongo da, pintura tailer batekin. Ume guztiek sari bat jasoko dute parte hartzeagatik.
Saritutako lan guztiak antolatzaileen esku geldituko dira eta uztailean Zelaieta Zentroko erakusketa aretoan ikusgai egongo dira.

Pintura lehiaketa
Aire zabaleko pintura lehiaketa Amorebietako erdigunean eta Etxanoko herrigunean egingo da eta margotu daitezkeenak, horietan daudenak izango dira (aldez aurretik adieraziko zaizkie lehiatzaileei).

Parte-hartzaileek mihiseak Zelaieta Zentroan zigilatu beharko dituzte, goizeko bederatzietatik hamaiketara bitartean (09:00-11:00). Lehiatzaile bakoitzak obra bakar bat aurkeztu ahal izango du eta teknika eta neurri jakinik ez da egongo. Lanak arratsaldeko lauak eta bostak artean aurkeztu beharko dira. Epaimahaia ZKAEk izendatutako kritiko bik, Ametxek izendatutako batek eta ZKAEko kide batek osatuko dute eta beraien erabakia arratsaldeko seietan (18:00) jakinaraziko dute Zelaieta Zentroko auditorioan.

Guztira zazpi lan sarituko dira. Lehenengo saria 500 eurokoa izango da, bigarrena 400 eurokoa eta hirugarrena 350 eurokoa. Laugarrenari eta bosgarrenari 300 € emango zaizkie. Gainera 200 euroko accesit bat egongo da, saririk jaso ez duen herriko lanik onenarentzat. Halaber, aurten publikoaren sari berri bat egongo da.

Zintzilik
Herriko balkoietan ikusgai izandako lanik onenak sarituko ditu “Zintzilik” arte lehiaketak. Horretarako, izena ematerakoan, parte-hartzaileek 1,30x1,50 metroko lona bat jaso dute. Deialdi honetan izena emateko epea maiatzaren 8an zabalduko da eta uztailaren 2ra arte egin ahal izango da Zelaieta Zentroan.

Enrike Renteria
Enrike Renteria Mardaraz 1900. urteko otsailaren 9an Larrean jaio zen, Amorebieta-Etxanon. Kaitanako eskolan margotzen hasi zen jadanik, autodidakta izanik. 1924. urtean Juan Gorbea eta Luis Icetak (Athleticeko kapitaina) deskubritu zuten eta bere lana Isidoro Guinea eta Antonio de Guezalari erakutsi zioten. Urte berean Euskal Artisten Elkarteko kide bihurtu zen eta hala izan zen elkartea 1937an desegin zen arte.

Renteria bokaziozko margolaria izan zen. Jarrera hau izan zuen bere bizitza guztian zehar eta margotzen jarraitzeko gogor borrokatu behar izan zuen. Renteria, pinturan murgilduta, naturak eskaintzen dituen zehaztasun ñimiñoei so egoten zen beti. Horrela, distira, euriaren hezetasuna, egunsentiko behe-lainoa, ezkutatzen ari den eguzkiaren epeltasuna … agertuko zaizkigu bere lanetan. Aire zabalean, zehaztasun txiki guztiak jasoz.

OINARRIAK HEMEN

PDF document icon Folleto Enrike 20193.pdf — PDF dokumentua, 7.10 MB (7446072 bytes)

2019ko jaietako kartel lehiaketak

2019/05/10
Aurten lehiaketa bi izango dira, bat umeentzat eta bestea nagusientzat. Kartelak ekainaren 10era arte aurkeztu ahal dira. Nagusien kartel lehiaketan herri bozketa egongo da Zelaieta zentroan.

AMOREBIETA-ETXANOKO 2019KO JAIAK SUSTATZEKO IRUDIRAKO (kartela, egitarauaren azala...) LEHIAKETAREN OINARRIAK

  1. Partaide bakoitzak proiektu bakarra aurkeztu ahalko du lehiaketara.
  2. Partaideak 16 urtetik gorakoak izango dira.
  3. Teknika eta formatua aukerakoak izango dira.
  4. Honako testu hau agertuko da nahitaez proiektuetan:

“Amorebieta-Etxanoko jaiak 2019, Karmenak eta Santanatxu. Uztailak 15-27”.

 Nahi den eran ezarri ahalko da testua, eta nahi den diseinua erabili.

  1. Euskarri digitalean aurkeztu beharko da ezinbestean proiektua (jpg, pdf edo psd).
  2. Proiektuak nora aurkeztu:

ZELAIETA ZENTROAN: Amorebieta-Etxanoko jaiak sustatzeko irudirako lehiaketa. Zelaieta parkea z/g 48340 Amorebieta-Etxano. Lehiatzailearen datuak gutun-azal itxi batean sartuko dira: izena, bi abizen, helbidea eta harremanetarako telefono zenbakia.

  1. Proiektuak aurkezteko epea 2019ko ekainaren 10ean amaituko da, 14.00etan.
  2. Lanek ezingo dute toki ikusgarrian eraman egilea identifikatzeko bide emango duen izena edo bestelako daturik.
  3. Pertsonaiaren bat irudikatuz gero, ezinbestean eduki beharko ditu egileak horretarako eskubideak.
  4. Aurkezten den proiektua ezingo da beste ezein lehiaketatan saritua edo merkataritza xedeetarako erabilia izan.
  5. Honela aukeratuko da proiektu irabazlea:
    1. Epaimahaiaren aukeraketa (Gutxienez 3 eta gehienez 6 kartel aukeratuko ditu jai batzordeak izendatutako hiru kideen epaimahaiak. Kideak, artista, diseinatzaile, argazkilariak edo arte, kultura eta komunikazio arloko pertsonak izango dira.
    2. Bozketa publikoa: Ekainaren 17tik 21era (21:00etan) Zelaieta zentroko harreran jarriko den boto-ontzian, bozkatzeko Ametx txartela erabiliko da identifikadore bezala. 12 urtetik gora eman ahal izango da botoa, eta boto bakarra pertsona bakoitzeko.
  6. Ekainaren 25ean aurkeztuko da zein den irabazlea, eguerdiko 12:00etan, Zelaieta zentroan eta ondoren udal eta Ametxeko  webguneetan.
  7. Ametxek konpromisoa hartzen du irabazle suertatzen den proiektua jaietako kartelean eta egitarauaren azalean erabiltzeko.
  8. Jaietako irudia egiteko erabiltzen diren irudiak edota testuak behar bezalakoak izango dira, generoen arteko berdintasunari dagokionez.
  9. Lehiaketan sari bakarra izango da:
    1. 1. Saria: Jaietako kartela izatea eta 800 euro garbi.

Bozketa publikoaren fasera pasatzen diren kartelak 200 euro garbi jasoko dituzte.

  1. Publikoaren erabakia apelaezina izango da.
  2. Lehiaketaren irabazleak edo behar bezala baimendutako honen ordezkariak, emandako saria jasotzeko eskubidea izango du. Irabazlea talde bat bada, taldearen ordezkariak jasoko du.
  3. Proiektu irabazlea Ametx Erakunde Autonomoari eta Amorebieta-Etxanoko udalari emango zaio, eta beretzat gordetzen dute erabiltzeko eskubide guztiak.
  4. Ametx erakunde autonomoak eta Amorebieta-Etxanoko udalak, erreprodukziorako eskubideak beraientzat gordetzen dituzte egokitzat jotzen dituzten formatu zein euskarrietan argitalatzeko, baita saritutako lana aldatzeko ere, materialaren ezaugarriak  edo euskarriak bere osotasunean argitaratzeko aukera ematen ez dutenean, eta lanaren zati eta elementu ezberdinak bakoitza bere aldetik erabiltzea ere.
  5. Lehiaketa honetan parte hartzeak berekin dakar oinarrion erabateko onarpena.
  6. Informazio gehiago, Zelaietako Zentroko harreran:

Ordutegia: Astelehenetik ostiralera,8:30-21:00.

Harremanetarako telefono zenbakia: 94 630 06 50

e-maila: zelaieta@ametx.eus

Helbidea: Zelaieta parkea z/g 48340 Amorebieta-Etxano (Bizkaia)

 

 

AMOREBIETA-ETXANOKO 2019KO JAIAK. UMEENTZAKO KARTEL LEHIAKETA

  1. Partaide bakoitzak proiektu bakarra aurkeztu ahalko du lehiaketara.
  2. Partaideak 16 urtetik beherakoak izango dira.
  3. Teknika eta formatua aukerakoak izango dira.
  4. Honako testu hau agertuko da nahitaez proiektuetan:

“Amorebieta-Etxanoko jaiak 2019, Karmenak eta Santanatxu. Uztailak 15-27”.

 Nahi den eran ezarri ahalko da testua, eta nahi den diseinua erabili.

  1. A4ean aurkeztuko dira proiektuak edozein euskarri motan
  2. Proiektuak nora aurkeztu:

ZELAIETA ZENTROKO GAZTETXOKOAN: Amorebieta-Etxanoko jaiak. Umeentzako kartel lehiaketa. Zelaieta parkea z/g 48340 Amorebieta-Etxano. Lehiatzailearen datuak gutun-azal itxi batean sartuko dira: Partaidearen izena, bi abizen, Arduradunaren izen abizenak eta helbidea eta harremanetarako telefono zenbakia.

  1. Proiektuak aurkezteko epea 2019ko ekainaren 10ean amaituko da, 20.00etan.
  2. Lanek ezingo dute toki ikusgarrian eraman egilea identifikatzeko bide emango duen izena edo bestelako daturik.
  3. Pertsonaiaren bat irudikatuz gero, ezinbestean eduki beharko ditu egileak horretarako eskubideak.
  4. Aurkezten den proiektua ezingo da beste ezein lehiaketatan saritua edo merkataritza xedeetarako erabilia izan.
  5. Honela aukeratuko da proiektu irabazlea:

Epaimahaiaren aukeraketa. Jai batzordeak izendatutako hiru kideen epaimahaia izango da. Kideak, artista, diseinatzaile, argazkilariak edo arte, kultura eta komunikazio arloko pertsonak izango dira.

  1. Ekainaren 25ean aurkeztuko da zein den irabazlea, eguerdiko 12:00etan, Zelaieta zentroan eta ondoren udal eta Ametxeko  webguneetan.
  2. Ametxek konpromisoa hartzen du irabazle suertatzen den proiektua Jaietan zehar Gaztetxokoan eta Ludotekan jartzeko eta Jaietako egitarauan agertzeko.
  3. Jaietako irudia egiteko erabiltzen diren irudiak edota testuak behar bezalakoak izango dira, generoen arteko berdintasunari dagokionez.
  4. Lehiaketan hiru sari izango dira:
    1. 1. Saria: 200 euro Dendariak elkarteko dendetan erabiltzeko bonoetan.
    2. 2. Saria: 100 euro Dendariak elkarteko dendetan erabiltzeko bonoetan.
    3. 3. Saria: 100 euro Dendariak elkarteko dendetan erabiltzeko bonoetan.
  5. Epaimahaiaren erabakia apelaezina izango da.
  6. Lehiaketaren irabazleak edo behar bezala baimendutako honen ordezkariak, emandako saria jasotzeko eskubidea izango du.
  7. Proiektu irabazlea Ametx Erakunde Autonomoari eta Amorebieta-Etxanoko udalari emango zaio, eta beretzat gordetzen dute erabiltzeko eskubide guztiak.
  8. Ametx erakunde autonomoak eta Amorebieta-Etxanoko udalak, erreprodukziorako eskubideak beraientzat gordetzen dituzte egokitzat jotzen dituzten formatu zein euskarrietan argitalatzeko, baita saritutako lana aldatzeko ere, materialaren ezaugarriak  edo euskarriak bere osotasunean argitaratzeko aukera ematen ez dutenean, eta lanaren zati eta elementu ezberdinak bakoitza bere aldetik erabiltzea ere.
  9. Lehiaketa honetan parte hartzeak berekin dakar oinarrion erabateko onarpena.
  10. Informazio gehiago, Zelaietako Zentroko Gaztetxokoan:

Ordutegia: Astelehenetik igandera, 17:00-20:00.

Harremanetarako telefono zenbakia: 94 630 06 50

e-maila: gazteinfo@ametx.eus

Helbidea: Zelaieta parkea z/g 48340 Amorebieta-Etxano (Bizkaia)

Igerilekuetako uraren tenperaturaz informatzen duen panela Larrean

2019/05/17

Larrea kiroldegiko igerilekuen erabiltzaileek uneoro jakin ahalko dute zein den uraren tenperatura, bertan ezarri den informazio panelari esker.

Erabilera kolektiborako igerilekuen arautegiaren arabera, uraren tenperatura 24º eta 28º zentigradoren artean egongo da beti, eta giroaren tenpratura berriz ± 2.º C-koa izango da urarekikoa.

Irekita dago Larrea kiroldegiko 2019ko uztaileko ikastaroetan izena emateko epea

2019/05/20
• Erabiltzaileek ez dute zertan Larreara joan aurretiko izen-ematea egiteko, eta etxetik gauza dezakete, Internet erabilita.

Ekainaren 12an amaituko da inskripzio epea, eta ekainaren 14an zozketatuko dira ikastarootan dauden lekuak, eguerdiko 12:00etan. Zozketa egin eta gero, 18an argitaratuko dira lekua duten pertsonen zerrendak, eta ekainaren 25era arte, gauzatu ahalko dute interesdunek ordainketa.

Gogorarazten da Ametx erakunde autonomoak ezarrita duela eskaintza osatzen duten ikastaroak antolatuko badira, ezinbestekoa dela matrikula egiten dutenen pertsona kopurua guztirako lekuen gehi bat izatea gutxienez.

Interesa duten pertsonek on-line bete ahalko dute, aurretiko-izen-ematea interesa duten  diziplinan edo, bestela, Larrea kiroldegira joanda.